Aqtaý ákiminiń eks-orynbasary Qazaqstanǵa jetkizilip, Shymkenttegi tergeý ızolıatoryna qamaldy
ASTANA. KAZINFORM – Qarjylyq monıtorıng agenttigi Bas prokýratýranyń úılestirýimen jáne Ulttyq qaýipsizdik komıtetimen birlese otyryp, izdeýde bolǵan Tımýr Sádýaqasovty Qazaqstan aýmaǵyna jetkizdi.
Ol asa iri kólemde alaıaqtyq jasaǵany jáne laýazymdy tulǵalarǵa para berýge ıtermelegeni úshin kúdikke ilingen.
2023 jylǵy shilde aıynda Tımýr Sádýaqasov pen advokat Qurmanbaev S.N. ózderiniń qyzmettik baılanysyn paıdalanyp, Dolgalev V.I.-diń iskerlik seriktesterine qatysty sotqa deıingi tergeý bastaý máselesin sheshýdi usynǵan.
Atalǵan máseleni sheshý úshin Sádýaqasov pen Qurmanbaev S.N.-ǵa zańsyz syıaqy retinde 225 mln teńge berý jóninde kelisim jasalǵan. Alaıda, kúdiktiler paranyń alǵashqy bóligi – 90 mln teńgeni alǵannan keıin bul qarajatty óz paıdasyna jaratqan jáne óz mindettemelerin oryndamaǵan.
Keıin Sádýaqasov qylmystyq jaýapkershilikke tartylýdan qaýiptenip, sottan jasyrynǵan.
Ol memlekettik shekarany zańsyz kesip ótip, Ózbekstan Respýblıkasynyń Shekara qyzmeti tarapynan ustalǵan. Soǵan baılanysty oǵan qatysty shekarany zańsyz kesip ótkeni úshin qylmystyq is qozǵalǵan.
2025 jylǵy 25 aqpanda Túrkistan oblysyndaǵy «Qaplanbek» shekara baqylaý-ótkizý pýnktinde ol Qarjylyq monıtorıng agenttiginiń qyzmetkerlerine tapsyrylyp, keıin Shymkent qalasyndaǵy tergeý ızolıatoryna qamaldy.
Jaqyn arada ol Pavlodar qalasyndaǵy tergeý ızolıatoryna jetkiziledi. Atalǵan is Pavlodar oblysynyń mamandandyrylǵan aýdanaralyq qylmystyq sotynda qarastyrylady.
Іzdeýde júrgen Aqtaý ákiminiń burynǵy orynbasary Ózbekstanda ustalǵanyn jazǵan bolatynbyz.