Aqtaý ákimdigi ınjenerlik jelilerdiń ústine kóp qabatty turǵyn úı salýǵa ruqsat berip jibergen
AQTAÝ. KAZINFORM — Aqtaýda 27-shaǵyn aýdannyń turǵyndary astynda barlyq ınjenerlik jeli ótip jatqan aıadaı jerge kóp qabatty turǵyn úıdiń salynýyna qarsy.
Olar bos jatqan aýmaqty turǵyndar tynyǵatyn, saıabaqqa aınaldyrýdy kózdep, ákimdikten ruqsat suraǵandaryn aıtady. Biraq, sol kezde ákimdik jerdiń astynda ınjenerlik jeliler bar dep, shyǵaryp salǵan. Alaıda kóp uzamaı ultaraqtaı jer telimi jekeniń qolyna ótip ketipti.
— Jerdi halyqtyń ıgiligine berý kerek. Bermeı me bos jatsyn. Úıimizdiń aınalasynda aınalatyn jer joq. Osy jer ǵana. Men ákimdikke bizge kómek kerek emes, ózimiz 5-10 teńgemizdi jınap, senbilik jasap, kógaldandyramyz dep ruqsat surap barǵanmyn. Ol jerge eshteńe salýǵa bolmaıdy dedi, — deıdi turǵyndardyń biri Jámılıa Bekbosynova.
Qazir turǵyndar atalǵan aýmaqty kezekpen kúzetip otyr. Óıtkeni, kásipker qurylys jumystaryna ázirlenip, qorshaý sala bastaǵan.
— Myna jerge eshteńe salmasyn. Myna júrgen azamattar jerdi basqa jerden, keń jerden alsyn. Jerdiń astymen jylý qubyry ótip jatyr, erteń ony zaqymdaıdy. Odan biz jylýsyz qalamyz. Onsyz da osy qysta jylýǵa jarymadyq, — deıdi Daǵystan Sarǵulov.
Memlekettik sáýlet qurylys-baqylaý basqarmasynyń bólim basshysy Qýandyq Amanqosulynyń aıtýynsha, jer kásipkerge zańdy túrde berilgen. Ol qurylys jumystaryn bastaý úshin basqarmaǵa eskertý jiberipti.
— Qazirgi tańda basshylyq qurammen kásipker arasynda kelssózder júrgizilip jatyr. Kásipkerdi shaqyryp, myna jerde bir emes, birneshe adamnyń jan aıqaıy bar ekeni aıtyldy. Tıisinshe qazirgi tańda qurylys montajdaý jumystary toqtatyldy. ıAǵnı, qurylysty saldyrmaý maqsatynda kelissózder júrgizilip jatyr, — deıdi bólim basshysy.
Buǵan deıin, Aqtaýda Kaspıı teńiziniń jaǵalaýynan qustardyń óleksesi tabylyp jatqanyn jazǵan bolatynbyz.