Aqtaý ákimdigi bir danasy 4,6 mıllıon teńgeniń qoqys jáshigin satyp almaqshy
AQTAÝ. KAZINFORM – Memlekettik satyp alý saıtynda Aqtaý qalasyna jerasty qoqys jáshikterin satyp alýǵa arnalǵan lot jarııalanǵan. Onda 192 konteınerdiń árqaısysyn 4 642 857 teńgege satyp alý kózdelgen. Satyp alýdyń jalpy somasy qosylǵan qun salyǵynsyz 891,4 mıllıon teńge turady.
Qujatta qoqys jáshikteriniń 3 danadan jer astynda turatyn eýrokonteınerler ekeni jazylǵan. Syıymdylyǵy 1,1 tekshe metr (1100 lıtr). Materıaly tot baspaıtyn bolattan jasalǵan. 891,4 mıllıon teńge materıaldar satyp alýǵa jáne eýrokonteınerleri bar 192 dana jerasty júıesin ornatýǵa arnalǵan shyǵyndarǵa jumsalmaq. Árbir júıege 3 dana, jalpy sany 576 dana kiredi.
Aqtaý qalalyq ákimdigininiń málimetinshe, búgingi tańda qala aýmaǵynda qatty turmystyq qaldyqtardy shyǵarý ózekti máselege aınalǵan. Aımaqtyń jeldi klımatyn eskersek, turmystyq qatty qaldyqtar ýaqytyly shyǵarylmasa, jelmen ushyp, qalanyń kórkine nuqsan keltirip jatyr. Sondyqtan byltyr 10 jerasty qoqys jáshigi (árqaısysynda 3 jáshikten) ornatylyp, tıimdiligin kórsetken.
— Sondyqtan sanıtarlyq tazalyqty qamtamasyz etip, qalanyń kórkin buzbaý úshin bıyl 192 jerasty qoqys jáshigin (árqaısysy 1,1 tekshe metr bolatyn 3 eýrokonteınermen) ornatý týraly sheshim qabyldandy. Bul jumystarǵa 891 mıllıon teńge bólindi (bir jerasty konteıneriniń somasy — 4,6 mln.teńge). Bul konteınerlerdiń artyqshylyǵy-tozýǵa tózimdi, jer asty ýrnasynyń qańqasy korrozııaǵa qarsy óńdeletin metaldyń qatty qabatymen jasalǵan, kótergish platformanyń joǵarǵy jaǵy qalyńdyǵy 1,5 mm tozýǵa tózimdi alıýmınıı paraǵynan jasalǵan. Kórsetilgen qunǵa materıaldardy satyp alý jáne jerasty júıesin ornatýǵa arnalǵan shyǵyndar kiredi. Ornatý oryndary merdiger uıym anyqtaǵannan keıin belgili bolady, — delingen habarlamada.
Buǵan deıin, Astanada qoqys jáshikteri jer astyna ornatyla bastaǵany týraly jazǵan bolatynbyz.