Aqtaý ákimi pandýsy joq nysandar týraly habarlaýdy surady
Qala ákimi Ǵalymjan Nııazov Facebook-tegi jazǵandaı, «aktaupandus» paraqshasynda atalmysh másele boıynsha atqarylǵan jumystar, turǵyndardyń usynys-pikirleri jarııalanatyn bolady.
«Sizderdi áleýmettik mańyzy zor osy sharaǵa bir kisideı atsalysýǵa shaqyramyn. Sebebi, ǵımarattardyń kópshiliginde pandýstar joq (nemese talapqa saı emes). Degenmen, jumystar atqarylýda. Búginde qaladaǵy eski avtojoldarda jaıaý júrginshilerge arnalǵan 52 ótkelde bordıýralar tómen túsirildi. 1 269 nysan pasporttalyp, onyń 220-sy múgedekterge beıimdelgen (bilim berý, densaýlyq saqtaý, sport, mádenıet, kommertsııalyq nysandar, memlekettik mekemeler bar)», - dedi qala basshysy.
Sondaı-aq Ǵ.Nııazovtyń málimetinshe, qala ákimdigine qarasty Arnaýly áleýmettik qyzmet kórsetý ortalyǵy kórý múmkindigi shekteýli jáne arbamen júretin 1 408 adamǵa ınvataksı qyzmetin kórsetti. Bul úshin ortalyqta «Mınıven» markaly 2 kólik jáne arnaıy jabdyqtalǵan 1 Gazel bar.
Kólik joldaryna 33 jol belgisi qoıyldy, 21 baǵdarshamǵa dybystyq qurylǵylar ornatyldy. Qaladaǵy 48 jol qıylysynyń 12-si múmkindigi shekteýli jandarǵa arnalyp beıimdeldi. Sonymen qatar, 2018 jyly bıýdjet esebinen 24 bilim berý nysany erekshe qajettiligi bar balalar úshin yńǵaıly bola túsken.
«Búginde atalǵan máseleni jan-jaqty oryndaý úshin, qala ákimdigi Instagram áleýmettik jelisinde «aktaupandus» jańa paraqshasyn ashty. Onda, turǵyndardyń usynys-pikirleri qaralatyn bolady», - dedi shahar ákimi.