Aqtaý ákimi qyzmetkerleri úshin jazaǵa tartyldy

AQTAÝ. QazAqparat - Aqtaý qalalyq ákimdiginiń qyzmetkerleri basqa memlekettik organdarmen salystyrǵanda jumystan tys ýaqytta keńsede jıi qalatyn bolyp shyqty. Sondyqtan qala ákimi Ǵalymjan Nııazovqa eskertý berildi, dep habarlaıdy QazAqparat tilishsi.

QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń MO boıynsha aýmaqtyq departamenti taldaý jumystaryn júrgizgen. Nátıjesinde, aýdan, qalalardyń ishinde jumys ýaqytynan tys jıi keshigetin memlekettik organdar arasynda Aqtaý qalasy ákimdigi men oǵan qarasty memlekettik mekemeler bar ekeni anyqtaldy. Júrgizilgen saýalnamaǵa qatysqan qyzmetshilerdiń 36,3 paıyzy jumystan keıin qalatynan aıtsa, 28,8 paıyzy demalys kúnderi jumysqa shyǵatynyn jetkizgen.  ıAǵnı, bul kórsetkish basqa organdarmen salystyrǵanda joǵary.

Mysaly, Aqtaý qalalyq turǵyn-úı kommýnaldyq sharýashylyǵy bóliminde 4 qyzmetshi shilde aıynyń ishinde óz erkimen jumystan shyǵyp ketken. Sebebin basshylar tarapynan beriletin tapsyrmalardyń kóptigimen, jumystan tys ýaqytta jıi qyzmette otyratynymen jáne demalys kúnderinde jumysqa shyǵatynymen túsindirgen.

Osy máseleniń mán-jaıyn anyqtaý úshin memlekettik organdardaǵy ádep jónindegi ýákildermen birigip, aǵymdaǵy jyldyń ótken kezeńinde 2 ret saýalnama júrgizildi. Onda 271 memlekettik organ, sonyń ishinde 171 jergilikti atqarýshy jáne 100 ortalyq atqarýshy organdardyń aýmaqtyq bólimsheleri qamtylǵan.

Mańǵystaý oblysy memlekettik qyzmet isteri jáne sybaılas jemqorlyqqa qarsy is-qımyl agenttigi departamenti basshysynyń orynbasary Erlegen Meńdalıevtiń sózinshe, qyzmetkerleri jumys ýaqytynan tys kóp jumys isteıtin mekemeler qatarynda Mańǵystaý oblysy ákimdiginiń bilim, mádenıet, sport, tabıǵat qorǵaý jáne qoǵamdyq densaýlyq saqtaý departamentteri de bar.

«QR Ákimshilik quqyq buzýshylyq Kodeksiniń 89-babynda jumys ýaqytynyń normasyn zańsyz asyrǵany úshin jumys berýshilerge ákimshilik jaza qarastyrylǵan. Eger zańdy talaptar oryndalmasa, mekeme basshylaryna aıyppul salynady. Aqtaý qalasy ákimi ádep keńesine shaqyrylyp, eskertý berildi», - dedi Erlegen Meńdalıev. 

Bul sharalar eń aldymen memlekettik qyzmetshilerdiń quqyqtaryn qorǵaý maqsatynda júrgizilýde. Sebebi memlekettik qyzmetshilerge meılinshe qolaıly jaǵdaı jasalýy tıis, olar bos ýaqytyn tynyǵýǵa, sportpen aınalysýǵa jáne taǵy basqa paıdaly zattarǵa jumsaýy kerek.