Aqtaý ákimi qoqys shyǵarý jumysyn durys uıymdastyrmaǵany úshin sógis aldy

AQTAÝ. QazAqparat - Búgin, 9 tamyzda aımaq basshysy Nurlan Noǵaevtyń qatysýymen ótken apparattyq keńeste oblystyń qala-aýdandaryndaǵy qatty turmystyq qaldyq shyǵarý jáne sanıtarlyq tazalyq máselesi qaraldy, dep habarlaıdy QazAqparat Mańǵystaý oblysy ákiminiń baspasóz qyzmetine silteme jasap.

Óńirde sanıtarlyq jaǵdaı jáne eldi mekenderdegi qatty turmystyq qaldyqtardy ýaqytynda shyǵarý máselesi ózekti.

Mańǵystaýdyń tarıhı-mádenı jáne tabıǵaty kórikti jerlerin týrıster de, turǵyndar da tamaq qaldyqtarymen lastap jatyr.

Sońǵy ýaqytta oblys ortalyǵynyń turǵyndary tarapynan túsetin qoqystyń jınalýyna qatysty shaǵymdardyń sany da aıtarlyqtaı ósti.

Turmystyq qaldyqtardyń ýaqytynda shyǵarylmaýy qalaǵa jaqyn mańda ornalasqan Munaıly aýdany jáne Túpqaraǵan aýdanyna qarasty Aqshuqyr aýylynyń turǵyndaryn da alańdatyp otyr.

- Eldi mekenderdiń sanıtarlyq jaǵdaıy alańdatarlyq másele. Aqtaý qalasynyń lastanýyna jol berýge bolmaıdy. Telegram chatqa túsetin shaǵymdardyń kópshiligi qoqys jınaý jáne shyǵarý máselesimen baılanysty. Qaldyqtardy ýaqtyly jınamaý qalanyń kórki men turǵyndardyń densaýlyǵyna keri áserin tıgizedi. Bul qala ákimi jumysynyń durys uıymdastyrylmaýynyń nátıjesi, - dep atap ótti Nurlan Noǵaev.

Jumysty durys uıymdastyrmaǵany úshin aımaq basshysy Aqtaý qalasynyń ákimine, onyń orynbasaryna jáne TÚKSh bóliminiń basshysyna sógis jarııalady.