Aqtaý ákimi 120 kommýnaldyq qyzmetkerdi dalada qaldyrmaýǵa ýáde etti
AQTAÝ. QazAqparat - Jeltoqsan aıynda "Qala joldary" jaýapkershiligi shekteýli seriktestiginiń 120 qyzmetkeri jumystan shettetilgen edi. Olar aryzdanyp, qalalyq ákimdikke barǵan bolatyn, dep habarlaıdy QazAqparat tilshisi.
Oqıǵanyń mán-jaıymen tanysqan shahar basshysy shuǵyl tekserý komıssııasyn quryp, brıfıng ótkizdi. Ákim: «120 qyzmetker qaıta jumysqa qabyldanady»,- dep ýáde berdi.
Jınalǵan qyzmetkerlerdiń aıtýynsha, jumys jeltoqsan aıynda toqtaǵan. Al, qala ákimdigi aqpannan beri basqa qyzmet usynbaı, ne burynǵy jasap júrgen jumystaryn bermeı, 120 adamdy áýre-sarsańǵa salyp qoıǵan.
«Qala joldary» bankrotqa túsken mekeme, sondyqtan sizderdi jumysqa ala almaımyz» dep jaýap berdi», - deıdi burynǵy qyzmetkerdiń biri Aqtóre Janaeva.
Brıfıngte shahar basshysy aldymen, mekemeniń bereshegin aıtyp berdi. Sebebi, jumysshy sanynyń qysqarýy osyǵan tikeleı baılanysty. "Qala joldarynyń" 421 mln teńge qaryzy bar eken.
«Mekemeniń kredıtorlyq bereshegi 160 mln teńge, salyqtarǵa 261 mln teńge, ıaǵnı 421 mln teńgeni quraıdy. "Qala joldary" 2 baǵyt boıynsha - sanıtarlyq tazalaý, avtomobıl joldaryn qamtamasyz etý jumystarymen búginge 820 jumys atqarýda», - deıdi Aqtaý qalasynyń ákimi Ǵalymjan Nııazov.
Ákimniń aıtýynsha, jumystan shyqqan 120 qyzmetker óz erkimen aryz jazyp ketken. Olar ótken jyly jalaqylaryn tolyǵymen alǵan. Al, búgingi jaǵdaı boıynsha zańsyz aıyptaýǵa bolmaıdy. Osylaı degen Ǵalymjan Nııazov, endi qalany kógaldandyrýmen aınalysatyn mekemege jumysqa alynady dedi.
Demek, jumyssyzdar dalada qalmaıdy. Olar rıza bolyp tarqasty. Jalpy, kógaldandyrý jumystaryna Aqtaýǵa 2018 jyly 957 mıllıon 451 myń teńge qaralǵanyn aıtady. Onyń ishinde ósip turǵan jasyl-jelekterge 560 mıllıon, jóndeý jumystaryna 48 mıllıon, jańadan aǵashtar egýge, kútip ustaýǵa 166 mıllıon teńge qarjy bólingen.
