Aqtaý ákimdigi medıtsınalyq qyzmetshige páter berýden zańsyz túrde bas tartqan
AQTAÝ. QazAqparat - №2 Aqtaý qalalyq sotynyń sýdıasy Muhıt Muqashev 31 jyldyq eńbek ótili bar medıtsına jumyskeriniń shaǵymyna sáıkes, memlekettik qordan páter berýden bas tartqan «Aqtaý qalalyq ákiminiń apparaty» MM-nyń áreketin zańsyz dep tanydy, dep habarlaıdy «QazAqparat» HAA tilshisi.
Aryzdanýshy - medıtsına jumyskeri D. Alıeva 2001 jyldan beri úı kezeginde tur.
Ótken jyldyń basynda D. Alıevaǵa ákimdiktiń turǵyn úı komıssııasynyń №20 hattamasy boıynsha, jekeshelendirilgen baspanasynyń bolýyna baılanysty páter berilmeıtindigi týraly jazbasha habarlaǵan.
Sot barysynda anyqtalǵandaı, talapker kezekke turý kezinde óziniń jekeshelendirilgen páteriniń bar ekendigin jasyrmaǵan. Onyń turyp jatqan páteri - 26 sharshy metrlik bir bólmeli (turǵyn aýmaǵy 14 metr), qazirgi tańda bul jerde otbasynyń 4 múshesi birge turady.
«Páter 1995 jyly alynyp, jekeshelendirilgen. Aryzdanýshy ol týraly habarlaǵan. Ákimdiktiń turǵyn úı komıssııasy silteme jasaǵan QR «Turǵyn úı týraly» zańy 16.04.1997 jyly qabyldanǵan. Osyǵan sáıkes, bul zań qabyldanbaı turyp, páterdi jekeshelendirý týraly jasalǵan kelisim atalmysh zańnyń normalaryn qarastyrmaıdy. Buǵan qosa, Zańnyń 75-babyn eskersek, talapker turmys jaǵdaıyn jaqsartý jáne turǵylyqty jerin keńeıtý maqsatynda memlekettik turǵyn úı qorynan páter alýǵa quqyly. Sot №20 hattamalyq sheshimdi zańsyz dep tanýǵa sheshim shyǵardy. Sot sheshimi zańdy kúshine endi», - dep túsindirdi sýdıa Muqashev sottyń sheshimin.
Aqtaý qalalyq ákimdiginiń turǵyn úı komıssııasynyń zańsyz hattamalyq sheshimderi saldarynan turǵyn úı máselesine qatysty kóptegen daý týýda. Osyǵan oraı, Aqtaý qalalyq ákimdigi osyndaı jaǵdaılardy eskere otyryp, «Turǵyn úı salasyndaǵy erejelerdiń biryńǵaı qoldanylýy» taqyrybynda dóńgelek ústel ótkizdi. Sharaǵa tek sýdıalar emes, sondaı-aq prokýratýra, quqyq qorǵaý organdary, advokattar alqasy jáne ákimdik qyzmetkerleri qatysty.
