«Aqtaý» AEA qyzmetin teńiz portynan góri munaıgaz salasyna baǵyttaýǵa basymdyq berý kerek -A. Raý
ASTANA. 16 shilde. QazAqparat - «Aqtaý» arnaıy ekonomıkalyq aımaǵy qyzmetin teńiz portynan góri munaıgaz salasyna qaraı qaıta baǵyttaýǵa basymdyq berý kerek.
Búgin Úkimet otyrysynda Indýstrııa jáne jańa tehnologııalar vıtse-mınıstri Albert Raý osylaı málimdedi.
«Jalpy, «Aqtaý teńiz porty» arnaıy ekonomıkalyq aımaǵynyń damýy oń úderiske ıe. Búgingi tańda jeke ınvestıtsııalar men bólingen bıýdjet qarajattarynyń araqatynasy 1-ge 2,5 paıyzdy quraıdy. Óndiris aýqymy 118 mlrd. teńgege jetken», - deıdi A. Raý.
Onyń aıtýynsha, «Aqtaý» AEA jaǵymdy úderis bolǵanymen, onyń áleýeti tolyǵymen paıdalanylmaı otyr.
«AEA negizgi qyzmetiniń baǵyty munaıgaz sektoryn barynsha qamtamasyz etý jáne aımaqta óndirilgen ónimderdi shetke shyǵarý úshin teńiz portynyń áleýetin barynsha paıdalaný bolatyn. Sondyqtan da, Aqtaý AEA qyzmetin qaıta qarap, ony teńiz portynan góri munaıgaz sektoryna baǵyttaý, onyń ishinde Kaspıı jaǵalaýy memleketteriniń eksportyna qaraı beıimdeý qajet dep oılaımyz», - dedi A. Raý.
