Aqtas kentindegi psıhıatrııalyq aýrýhana patsıentterine qatygezdik kórsetilgeni ras pa
ASTANA. KAZINFORM – Almaty oblysynyń Aqtas kentindegi jiti baqylanatyn mamandandyrylǵan úlgidegi respýblıkalyq psıhıatrııalyq aýrýhana patsıentterine qatygezdik kórsetildi degen áleýmettik jelidegi aqparat resmı tekserý barysynda rastalmady, dep habarlaıdy Densaýlyq saqtaý mınıstrligi.
Instagram áleýmettik jelisinde atalǵan medıtsınalyq uıymdaǵy patsıentterdiń quqyqtary buzylǵany týraly aqparat jarııalanǵan. Osyǵan baılanysty Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń Almaty oblysy boıynsha departamenti aýrýhanaǵa tekserý júrgizdi.
Jarııalanym avtory óziniń jeke estelikterine súıenip, oqıǵalar 2008 jyly medıtsınalyq uıymnyń 7, 10 jáne 12-bólimshelerinde bolǵanyn málimdegen. Bul rette avtordyń derbes derekteri kórsetilmegen. Al sıpattalǵan oqıǵalar shamamen 18 jyl burynǵy kezeńge qatysty.
Qoǵamdyq rezonansqa baılanysty tekserý barysynda medıtsınalyq kómek kórsetý kezinde zańnama talaptarynyń saqtalýy, psıhıkalyq densaýlyq salasyndaǵy medıtsınalyq-áleýmettik kómektiń sapasy jáne patsıentterdi dárilik zattarmen qamtamasyz etý máseleleri zerdelendi.
– 2026 jylǵy 7 tamyzdaǵy №127 tekserý nátıjeleri týraly aktige sáıkes patsıentterge fızıkalyq shekteý sharalaryn qoldaný, yqpal etý sharasy retinde dárilik preparattardy paıdalaný jáne patsıentterdiń ar-namysyna tıetin ózge de áreketter týraly málimetter óz rastaýyn tappady, – dep málimdedi mınıstrlik.
Vedomstvonyń málimetinshe, áleýmettik jelidegi jarııalanymda keltirilgen málimdemeler resmı tekserý barysynda anyqtalǵan naqty mán-jaılarǵa sáıkes kelmeıdi.
Densaýlyq saqtaý mınıstrligi árbir patsıenttiń quqyqtaryn, ar-namysy men qaýipsizdigin saqtaý sózsiz basymdyq ekenin atap ótti. Psıhıkalyq buzylystardy dıagnostıkalaý jáne emdeý Qazaqstan zańnamasyna jáne Densaýlyq saqtaý mınıstriniń 2020 jylǵy 30 qarashadaǵy № QR DSM-224/2020 buıryǵynyń talaptaryna sáıkes júrgiziledi.
– Mınıstrlik medıtsınalyq kómektiń sapasyna jáne patsıentterdiń quqyqtarynyń saqtalýyna baqylaýdy jalǵastyrady, – delingen habarlamada.
Sondaı-aq vedomstvo kórineý jalǵan málimetterdi taratý olardyń mazmuny men taralý mán-jaılaryna qaraı Qazaqstan zańnamasynda kózdelgen jaýapkershilikke ákep soǵýy múmkin ekenin eskertti.
Aıta keteıik, buǵan deıin Densaýlyq saqtaý mınıstrligi respýblıkalyq psıhıatrııalyq aýrýhanaǵa tekserý júrgizetini habarlandy.
