AQTAN BATYR

an Aqaıuly (shamamen 1770-1854) halyq batyry. Rýy - Qarakesek. Janqoja batyrdyń úzeńgiles serigi, onyń Hıýa, Qoqan bekinisterine jasaǵan joryqtaryna qatysqan.

Qazirgi Qyzylorda oblysynyń Qazaly aýdany Aqtan batyr (Aryqbalyq) aýylyna qarasty Túlkiqashqan qonysynda dúnıege kelgen.

HІH-shy ǵasyrdyń 20-shy jyldarynan bastap Syr boıy men Aral teńiziniń shyǵys jaǵalaýyn qonystanǵan qazaqtarǵa óz ústemdigin júrgize bastaǵan Hıýa, Qoqan handyqtary 1830-1840 jyldary jergilikti halyqqa óktemdigin odan ári kúsheıtti. Hıýa handyǵy Jańadarııa, Qýańdarııa, Qyzylqumnan ótip, Qosqorǵan, Aral teńizderine deıingi aralyqtaǵy Syr boıyndaǵy qazaqtarǵa shapqynshylyqtar jasap, malyn barymtalap, áıel, bala-shaǵalaryn tutqynǵa alyp ketip otyrdy. Qoqandyqtar shekara bekitip, ákimshilik quryp, 1817 jyldan bastap salyna bastaǵan bekinisterinen árkez jasaqtar shyǵaryp, beıbit eldi shaýyp, alym-salyq jınap turdy. Osyndaı zorlyq-zombylyqtan japa shekken qazaqtar, jastaıynan ádildigimen, batyrlyǵymen elge tanymal bolǵan Janqojanyń tóńiregine toptasady.

Jalpaq jurtqa belgili jaıt - Syr boıy qazaqtarynyń Hıýa, Qoqan handyqtarynyń ezgisine jáne Reseı otarshylaryna qarsy ult-azattyq kóterilisiniń basshysy Janqoja qarakesek Aqtan batyrmen birge kóne Jankenttiń janyndaǵy Hıýa bekinisi - Jańaqalany tas-talqan etedi. P.Ivanovtyń kórsetýi boıynsha, bul oqıǵa 1842 jyly bolǵan.

Jańaqalany alardaǵy uıymdastyrýshylyǵy men janqııarlyq batyrlyǵy úshin halyq qarakesek Aqtan Aqaıulyn búgingi kúnge deıin erekshe iltıpatpen ataıdy. Qazaqtyń sanaýly batyrlarynyń biri dep biledi.

Sondaı-aq osy jyldyń qazan aıynda Hıýa handyǵynyń syr boıy qazaqtarynan ushyr, zeket jınaýǵa qoıylǵan naıyby Babajan sarttyń kóne Jankent shaharynyń mańyndaǵy bekinisi Besqalany alarda erlik kórsetken. Aqtan batyr bastaǵan qazaq sarbazdary qamaldy qorshaýǵa alyp, Babajandy qolǵa túsirip, Janqoja batyrdyń úkimimen jazalaǵan.

Aqtan batyrdyń beıiti Aqtóbe oblysynyń Bersúgir beketiniń batysyna qaraı 30-35 shaqyrym qashyqtyqtaǵy Tebensaı degen jerde. Burynǵy Aryqbalyq eldi mekenine Aqtan batyrdyń esimi berilgen.

Derek kózi:

Qazaqstan ulttyq entsıklopedııasy, 1 tom.