Aqsýlyqtar sý basý qaýpine qaramastan qonys aýdarýdan bas tartty
PAVLODAR. QazAqparat - Aqsý qalasynyń turǵyndary jyl saıyn týyndaıtyn sý basý qaýpine qaramastan jaıylym jerden kóshýden bas tarýda, dep habarlaıdy pavlodarnews.kz.
Oblys ákimdiginde ótken keńeıtilgen otyrysta aımaq basshysy Bolat Baqaýov Aqsý qalasynyń ákimi Nıkolaı Dychkodan turǵyndardy kóshirý jumysy qalaı júrip jatqany jaıly surady. - Aqsý qalasyndaǵy alty-jeti úıdi sý basatyn, - dedi oblys ákimi. - Men osy turǵyndarmen sóılesip, basqa jerge kóshirý týraly tapsyrma bergen bolatynmyn. Kezinde jaıylma jerde qurylys júrgizilgeni túsinikti. Bul baǵytta ne tyndyryldy?".
Nıkolaı Dychko sý tasqynynan qorǵaıtyn dambany bekitý jumystary tolyq atqarylǵanyn jetkizdi. - Josparlanǵan sharalardan basqa, dambaǵa jaqyn jerdi sý shaıyp ketýden saqtaıtyn iri gabarıtti beton ornattyq, - deıdi Nıkolaı Dychko. - Oqý- jattyǵý sharalary ótkizildi. «QazAvtoJol» UK» AQ oblystyq fılıalymen birge sý basýdyń aldyn alý maqsatynda sýaǵarlardy ýaqytynda ashý boıynsha jumys atqaryldy. Alaıda turǵyndar sol jerden kóshýden bas tartýda jáne úılerin tastaǵylary kelmeıdi. Eń shette turatyn 80 jastaǵy ájeımen sóılesken edim. «Ulym, kómektesińizder, osynda qalamyz» deıdi. Turǵyndardyń qonys aýdarýdan bas tartyp otyrǵanyn oblystyq TJD bastyǵynyń mindetin atqarýshy Samat Asaıynov ta rastady. - Bul jerde durys jumys isteý kerek. Turǵyndardyń arasynda túsindirý jumystaryn júrgizip, kóndirý qajet. Ol jerdegi úıler ábden tozyǵy jetken. Tasqynnyń aldyn alý úshin ne istemedik deısiz? Qaptar qoıylatyn. Buǵan qosa, olar osyndaı ýaqytta sol jerde turmaıdy. Jazda saıajaı retinde ustaıdy».
Aımaq basshysy aýdandar men qalalardyń ákimderine eldi mekenderdegi sý ótkizetin qurylǵylardy ýaqtyly tazartýdy jáne qorǵanys dambasynyń jaǵdaıyn tekserýdi, sý tasqyny mezgilin erekshe baqylaýǵa alýdy tapsyrdy.
Eske sala keteıik, 2015 jyly sáýir aıynda Aqsý qalasynda tótenshe jaǵdaı oryn alǵan bolatyn. Ertis ózeniniń erneýinen asýy saldarynan 15-ten astam úıdi sý basqan.
