Aqsýlyq zaýyt ferroqorytpanyń 35 mıllıonynshy tonnasyn shyǵardy
ASTANA. QazAqparat - Tabıǵı resýrstardy óndirý jáne qaıta óńdeý salasynda ártaraptandyrylǵan jetekshi kompanııa (ERG) Eýrazııalyq Top quramyndaǵy «Qazhrom» TUK» AQ fılıaly Aqsý ferroqorytpa zaýyty ferroqorytpanyń 35 mıllıonynshy tonnasyn qorytyp shyǵardy, dep habarlaıdy pavlodarnews.kz.
50 jyldyǵyn atap ótip jatqan hrom, kremnıı jáne marganets qorytpalaryn shyǵarýshy metallýrgııalyq zaýyt Qazaqstanda óndiriletin ferroqorytpanyń 60 protsentin bir ózi shyǵarady. Ferroqorytpalardyń mereıtoılyq tonnasyn qorytýdyń qurmetti mıssııasy ekinshi balqytý tsehynyń 21-pesh brıgadasyna senip tapsyrylǵan. Aqsý ferroqorytpa zaýytynan eń birinshi metall ferrosılıtsıı osy peshte alynǵan bolatyn. Ferroqorytpalardyń mıllıondyq tonnasyn shyǵarýǵa alty jyldan astam ýaqyt qajet bolǵan eken. Qazirgi tańda kásiporyn jylyna bir tonnadan astam qorytpa shyǵarady. Zaýyt óniminiń basym bóligi sheteldik tutynýshylarǵa jiberiledi, bul ónim Japonııada, Koreıada, Qytaıda, Eýropada, sondaı-aq AQSh-ta jáne Reseıde suranysqa ıe.
«Eýrazııalyq Toptyń ınvestııalyq saıasatynyń arqasynda Aqsý ferroqorytpa zaýytynyń álemdik naryqtaǵy kóshbasshylyǵyn saqtap qalýǵa múmkindik berer tıimdi óndiristi jańǵyrtý jumysy turaqty túrde iske asyrylyp keledi. Dóń taý-ken baıytý kombınatynyń qomaqty ken qory bizdi shıkizatpen uzaq jyldar boıy úzdiksiz qamtamasyz ete alady. Eń bastysy - bizdiń jumyskerlerimiz kez kelgen óndiristik máselelerdi sheshe biletin joǵarǵy bilikti mamandar», - deıdi Aqsý ferroqorytpa zaýytynyń dırektory Sergeı Prokopev.
«Alǵash metaldy óndirgenimiz áli esimde. Barlyǵy «Alaqaı!» dep aıqaılap, qýanyshtarymen bólisip jatty. Zaýytty búkir Odaq bolyp turǵyzdyq, bizge elimizdiń barlyq ferroqorytpa zaýytynan eń myqty degen mamandar keldi. Olar peshti birinen keıin birin óndiriske engizip jatty», -dep eske aldy saltanatty rásimge qatysqan zaýyt ardageri, 1977 jyly «Eńbek Qyzyl Tý» ordenimen marapattalǵan Vladımır Shýshýev. Sanaly ǵumyrynyń 30 jylyn osy zaýytta ótkizip, erekshe eńbek sińirgen Mymbaı Týlev, Valentın Kıreev jáne Qadyrbaı Bakradenov syndy ardagerler de arnaıy shaqyrylǵan. Saltanatty shara ferrohromnyń mereıtoıly kesegin zaýyt murajaıyna tabys etýmen aıaqtaldy.
