Aqsýlyq bıshiler Halyqaralyq baıqaýda bas júldeni jeńip aldy
ASTANA. QazAqparat - Almaty qalasynda ótken «Qazaqstannyń rozasy» halyqaralyq baıqaýynan «Aıgólek» úlgili bı ansambli bas júldeni jeńip aldy, dep habarlaıdy pavlodarnews.kz.
Aqsý qalasy ákimi baspasóz qyzmetiniń málimetinshe, atalmysh baıqaý osydan úsh jyl buryn alǵash ret Qazaqstan, Reseı jáne Bolgarııa elderiniń uıymdastyrýymen bastaý alǵan. Sodan beri talaı dúldúlder men bulbuldardyń baǵyn ashqan dástúrli dodada bul joly 190 bıdiń ishinen «Aıgólek» úlgili bı ansambliniń óneri joǵary baǵalandy.
Olar baıqaýǵa tórt bı daıyndap barǵan. Jurtshylyq nazaryna qazaqtyń «Toı dýman», uıǵyrdyń «Sadıana», arnaıy tapsyrma boıynsha «Roza jaıly bı» jáne «Qysqy rapsodııa» bıleri usynyldy.
Budan bólek, «Ulttyq bı» nomınatsııasynda 15-19 jas aralyǵynda Gúlzat Tastemir «Avrıshım» bıimen birinshi dárejeli laýreat ataǵyna laıyq dep tanyldy.
- Baıqaýda bizdiń bılerimiz ulttyq boıaý, halyqtyq naqyshymen este qaldy, - deıdi bı tobynyń jetekshisi Dınara Zembaeva. - Repertýarymyz qazylar alqasy músheleriniń kóńilinen shyqty. Jeńimpazdarǵa aldaǵy ýaqytta Bolgarııanyń Obzor qalasynda ótetin baıqaýǵa joldama men aqshalaı sertıfıkat tabystaldy. Sonymen qatar, jetekshiler «Joǵary pedagogıkalyq sheberligi» men ujymymyz «Úzdik baletmeıster jumysy úshin» dıplomdarǵa ıe boldy.
Aıta keterligi, ujymdaǵy uldar Almaty qalasyndaǵy A. Seleznev atyndaǵy horeografııalyq ýchılıshege oqýǵa shaqyrý aldy. Bul balalardyń barlyǵy Aqsý qalasyndaǵy daryndy balalarǵa arnalǵan mamandandyrylǵan gımnazııanyń shákirtteri.
