Aqsýǵa jaıaý barmaq bolǵan - Polıtseı úsip qala jazdaǵan adamdy qutqardy

PAVLODAR. KAZINFORM - Túngi ýaqytta jolsyz dalamen tóteleı tartqan jaıaý júrginshini ýchaskelik ınspektor qutqaryp qalǵan. Er adam jedel járdem qyzmetine aman-esen tapsyryldy.

Aqsý qalasynyń ýchaskelik polıtseıi Ramazan Saǵyndyqov tún ortasynda oblys ortalyǵynan Aqsý kentine jaıaý shyǵyp ketken turǵynnyń ómirin saqtap qaldy.

«WhatsApp chatyna Pavlodardan kentke bet alǵan er azamat jaıynda habarlama tústi. Men birden onyń aldynan shyqtym. Ol jolda kele jatqanda týysyna telefon shalyp, óziniń adasyp ketkenin aıtqan. Men ápkesinen nómirin alyp, habarlastym da, ony jolsyz daladan izdeı bastadym. Azdap ishkeni bar eken. Kúsh-qýaty taýsylyp, qatty tońyp qalǵan, tipti qar ústine jatyp uıyqtap kete jazdaǵan. Ony der ýaqytynda taýyp aldym», - deıdi R.Saǵyndyqov.

Ýchaskelik ınspektor kent turǵynyn áýeli polıtsııa pýnktine jetkizgen, sodan soń jedel járdem qyzmetine tapsyrdy.

Qutqarylǵan azamattyń sózinshe, ol kentke baratyn joldan túsip, tótemen tartyp ketken. Sóıtip baǵdaryn joǵaltyp, adasqan.

Eske sala keteıik, buǵan deıin pavlodarlyq polıtseıler turǵylyqty jeri joq 13 adamdy úsip qalýdan saqtady.