Aqsýdaǵy zaýytta kran kabınasy janyp, 57 jastaǵy áıeldi kúıik shaldy
AQSÝ. QazAqparat – Aqsýdaǵy ferroqorytpa zaýytynda kran kabınasy janyp, 57 jastaǵy áıeldi kúıik shaldy, dep habarlaıdy Pavlodarnews.kz Pavlodar oblysy TJD baspasóz qyzmetine silteme jasap.
«Kran órtendi. Oqıǵa ornynda «Qazhrom» TUK AQ fılıalyn kúzetý jónindegi órt sóndirý bólimi jumys istedi. Órt alańy tórt sharshy metrdi qurady», - dep málim etti baspasóz qyzmeti.
Pavlodar oblysy eńbek basqarmasynyń dereginshe, kranshy zardap shekken.
«9 jeltoqsanda saǵat 14.37-de «Qazhrom Transulttyq kompanııasy» AQ Aqsý ferroqorytpa zaýytynyń aýmaǵynda, №6 tsehta shómishten qoj balqymasyn ydysqa elektr kópirli kranmen quıý jumystaryn júrgizý kezinde qaıǵyly jaǵdaı oryn aldy. Saldarynan kran mashınısi denesiniń 10-12 paıyzyn termııalyq kúıik shaldy», - dep habarlady eńbek jónindegi bas ınspektor Asqar Qapanov.
Memlekettik eńbek ınspektsııasy jazataıym oqıǵa qatysty tergeý uıymdastyrady.
Oblystyq densaýlyq saqtaý basqarmasynda áıel adamnyń jaǵdaıy ortasha aýyr, birqalypty dep baǵalaýda. 57 jastaǵy áıel 9 jeltoqsan kúni aýrýhanaǵa jetkizildi.
