Aqsýdaǵy jańa qazandyq iske qosylsa, jylý tarıfi 2,5 ese ósip ketýi yqtımal

PAVLODAR. KAZINFORM - Pavlodar oblysynyń ákimi Asaıyn Baıhanov bul tyǵyryqtan shyǵýdyń joly – bıýdjettik mekemelerge arnalǵan tarıfti 5 ese kóterý kerek dep esepteıdi. Esesine jeke tutynýshylarǵa túsetin salmaq azaıady.

Óńir basshysy Asaıyn Baıhanov Aqsý qalasynda 2019 jyly jańadan salynyp, áli kúnge qańtarylyp turǵan ortalyq qazandyqtyń jaı-kúıi týraly aıtty.

- Aqsý qalasyn jylytýǵa arnalǵan jańa qazandyqtyń qurylysynda áý basta ınjenerlik qatelikter ketkenin buǵan deıin de aıtqanbyz. Qazandyqtan shyǵatyn jylýdyń temperatýrasy 110 gradýs, qysymy sharshy santımetrine 9,5 kg bolýy kerek. Alǵashqy synaqtarda bul normany baǵyndyrý qıynǵa túsip, kemshilikterdi joıý uzaq ýaqytqa sozyldy. Endigi arada odan shyǵatyn jylýdyń tym qymbatqa túsetini belgili bolyp otyr. Eger keler jyly qazandyq iske qosylar bolsa, qaladaǵy jylý tarıfi birden 2,5 ese ósip shyǵa keler edi. Bul jaǵdaıdy boldyrmaý úshin bıýdjettik mekemelerge arnalǵan tarıfti 5 ese, al jeke tutynýshylarǵa 20 paıyz arttyrýdy usynyp otyrmyz. Tek osylaısha ǵana qala turǵyndaryna aýyrtpalyq túsirmeımiz, - deıdi A.Baıhanov.

Sońǵy jyldary Aqsýda jańadan turǵyn úıler men áleýmettik nysandar kóptep salynyp jatqany sebepti jylý tapshylyǵy aıqyn sezile bastaǵan. Aqsý ferroqorytpa zaýytynda ornalasqan eski qazandyqtyń qýaty qalany jylytýǵa áreń jetip otyr. Keler jyldyń sáýir aıynda jańa qazandyqta synaq jumystary júrgiziledi. Eger barlyǵy sátti júrgizilse, onda komıssııa nysandy qabyldaýy yqtımal.

Jalpy Pavlodar oblysynda búginde 1,7 myń shaqyrymdaı jylý jelisi bar. Olardy jyl saıyn jańartýǵa bólinetin qarajat nebári 100 shaqyrymǵa jetedi. Mundaı qarqynmen barlyq jylý qubyrlaryn jańalap shyǵýǵa 17 jyl ýaqyt keter edi. Óńir Úkimetten bul baǵytqa bólinetin qarajatty eki ese kóterý týraly usynys jasap otyr.

Aqsý qalasynda 50 700 adam tursa, turǵyn úılerdiń 257-si ortalyqtandyrylǵan jylý júıesine qosylǵan. Shahardaǵy jylý jelileriniń uzyndyǵy 90 shaqyrymdaı bolady. Jylý qubyrlarynyń 67 paıyzy tozǵan.

Eske sala keteıik, 25 jeltoqsan kúni tańǵy jetilerde Aqsýdyń jylý júıesinde apat bolyp, úılerde jylý tómendep ketti.

Jylý júıesindegi apattyq jaǵdaı sol kúni tústen keıin joıylyp, keshkilik jylý parametrleri qalpyna keldi.