Aqsýdaǵy jańa qazandyq bıyl da iske qosylmaýy múmkin
PAVLODAR. KAZINFORM - Aqsý qalasynda qurylysy 2017 jyly qolǵa alynǵan jańa qazandyqtyń jyry áli kúnge aıaqtalǵan joq. Energetıkalyq nysan birneshe jyldan beri iske qosyla almaı tur.
Mamandar bar kiltıpan áý basta jiberilgen ınjenerlik sheshimderde deıdi. Energetıka salasynyń ıisi murnyna barmaıtyndardyń syzǵan syzbalary memlekettik saraptamadan qalaı ótip ketkeni tańǵaldyrady. Nysan aldaǵy qysqa taǵy daıyn bolmaı shyǵatyn túri bar. Qurylysyna 11 mlrd teńge jumsalǵan energetıkalyq nysan 2019 jyly paıdalanýǵa berilýge tıis-tin.
Aqsý qalasyndaǵy jańa qazandyq jýyq ýaqytta jumys istep ketetinine Pavlodar oblysynyń ákimi Asaıyn Baıhanov ta kúmánmen qarap otyr. Sońǵy tehnıkalyq aýdıt nátıjesinde jobalaýshylar sýdy hımııalyq daıyndaý tsehyn qarastyrmaǵany belgili bolǵan.
- Qazandyqty tamyz aıynda taǵy da synaqtan ótkizemiz. Alaıda onyń jumys istep ketetinine kúmánim bar. Biz tehnıkalyq aýdıtti aıaqtadyq, qazandyq jobasynda tórt jaǵdaı qate jasalǵan. Eń áýeli, jańa qazandyqtyń rezervtik elektr qýaty joq. Ekinshi másele - ol aýyzsýmen jumys isteıdi, ıaǵnı tehnıkalyq sý qarastyrylmaǵan. Al aýyzsý hımııalyq daıyndyqty talap etedi, biraq mundaı tseh joq. Bul 2017–2018 jyldardaǵy jobalaý qatelikteri bolǵan. Merdiger soǵan oraı jobany túzetýdi, qunyn ósirýdi jáne qosymsha qarajat bólýdi surap otyr. Biraq biz munymen kelispeımiz, jobalaýshylardy jaýapkershilikke tartý kerek dep esepteımiz. Qazirgi ýaqytta bul boıynsha sot talqylaýlary júrip jatyr. Negizgi problemalyq aspekti - dál osy sý daıyndaıtyn tsehtyń joqtyǵy. Ol óte qymbat turady, ıaǵnı quny 1 mıllıard teńgeden asyp ketetini anyq. Al ózge máselelerdi sheshýge bolady, - dep atap ótti óńir basshysy.
Buǵan deıin Aqsýdaǵy jańa qazandyq iske qosylsa, jylý tarıfi 2,5 ese ósip ketýi yqtımal ekenin jazǵanbyz.
