Aqsýda joǵalǵan balalar kompıýterlik klýbtan tabyldy
PAVLODAR. QazAqparat - 13 qazanda tańerteń polıtsııaǵa Aqsý qalasynyń turǵyny júgindi. Ol 2005 jyly týǵan balasy 12 qazanda saǵat 16-larda úıden ketip, úıine oralmaǵany týraly aıtty, dep habarlady Pavlodar oblystyq ІІD baspasóz qyzmetinen.
Polıtseıler izdeý sharalaryn uıymdastyrdy. Joǵalǵannyń dostary men synyptastary jaýapqa alyndy. Bala 2004 jyly týǵan dosymen kompıýterlik klýbqa oınaýǵa ketkeni týraly belgili boldy. Ony teksergende kompıýterlik klýbqa kiretin esik jabyq boldy. Shamamen tańǵy saǵat 10-da klýb ashyldy, jetkinshekter ol jerden shyǵyp, úılerine bardy. Olar túni boıy kompıýterlik klýbta bolǵanyn aıtty.
Bul fakt kámeletke tolmaǵandar quqyqtary jáne isi boıynsha qalalyq komıssııa otyrysynda qaralady.
Balalardyń ata-analaryna kámeletke tolmaǵandar túngi ýaqytta kóńil kóteretin mekemelerde zańdy ókilsiz júrgeni úshin QR ákimshilik quqyqbuzýshylyq kodeksiniń 442-baby 1-bólimi boıynsha 3 AEK kóleminde aıyppul salyndy.
Kompıýterlik klýbtyń ıesine qatysty kámeletke tolmaǵan balalrdyń túngi ýaqytta kóńil kóterý oryndarynda júrgeni úshin QR ákimshilik quqyqbuzýshylyq kodeksiniń 132-babyna sáıkes ákimshilik óndiris qozǵalyp, is sotqa jiberildi. Atalǵan bapta 45 AEK kóleminde aıyppul tóleý qarastyrylǵan.
