Aqsýda Jastar jyly aıasynda neke qııý zaly ashyldy - Pavlodar oblysy
«Azamattyq hal-aktilerin tirkeý bólimi adam ómiriniń eń mańyzdy belesi - otbasyn qurý rásiminiń erekshe qýanysh ekenin aıshyqtaý, umytylmastaı este qaldyrý úshin qyzmet etetin bolady. Jańadan eńse tikteıtin bólimde azamattyq hal-aktilerin jazý qyzmeti úshin barlyq jaǵdaı jasalmaq. Jańa oryn nekege otyratyn jastardyń kóbeıip, berekesi myqty otbasylardyń qataryn tolyqtyratynyna senimdimin», - dedi nysannyń ashylý saltanatyna qatysqan Aqsý qalasynyń ákimi Balǵabaı Ybyraev.
AHAJ bóliminiń kógildir lentasy qıylǵan soń Asylbek Qabdrash pen Oralsyn Nurqabyl alǵashqy bolyp jańa týǵan nárestesi - Aızereniń týý týraly kýáligin aldy. Qala ákimi jas ata-anaǵa densaýlyq pen baqyt tilep, sábıdiń týý týraly kýáligi men men estelik syılyq tabys etti. Metallýrgter shaharynda jyl saıyn otbasyn qurǵandardyń sany artyp keledi. Mysaly, 2017 jyly 461 neke qıylsa, 2018 jyly 490 otbasy, al bıyl qańtar aıynda otyz jas otaý shańyraq kótergen. Jas jubaılarǵa izgi tilekterin Aqsý ferroqorytpa zaýyty kásipodaq uıymynyń tóraǵasy Nıkolaı Sýhoterın, qalalyq «Nur - Ana álemi» qoǵamdyq birlestiginiń tóraıymy Rymkesh Slambekova jáne qalalyq ardagerler keńesiniń tóraǵasy Zalmuqan Arynuly bildirdi.
Aıta keterligi, buǵan deıin AHAJ bólimi yńǵaısyz ári tar ǵımaratta ornalasqan edi jáne neke qııý zaly bolmaǵan. Turǵyndar tarapynan birneshe jyl qatarynan kóterilip kele jatqan másele bıyl sheshimin tapty. Jańa oryn jalpy aýmaǵy 130 sharshy metrdi alady. Bul jerde neke qııý zaly, muraǵat jáne birneshe kabınet ornalasqan.
