Aqsýda zańsyz nesıe berý arqyly 9 mln teńge paıda tapqan turǵyn ustaldy
PAVLODAR. QazAqparat - Pavlodarlyq polıtseıler alaıaqtyqtyń 19 faktisi boıynsha kúdikti Aqsý qalasynyń 26 jastaǵy turǵynyn ustady, dep habarlaıdy pavlodarnews.kz.
Bul týraly oblystyq polıtsııa departamentiniń baspasóz qyzmeti málim etken.
«Polıtsııaǵa Aqsý qalasynyń turǵyny 2018 jylǵy sáýirde kompıýterlik tehnıkany satatyn dúkende bir bankiniń menedjeri 500 myń teńge nesıeni oǵan zańsyz resimdegeni týraly shaǵymdandy. Buǵan uqsas shaǵymdar Aqsý qalasynyń basqa da turǵyndarynan túse bastady. Kúdikti negizinde 500 myń teńge kólemindegi nesıelerdi tirkegen»,- dedi baspasóz qyzmetinde.
Іs-shara ótkizý barysynda kúdikti Almaty qalasynda ustaldy. Jas adam qala bankileriniń birinde menedjer bolyp isteı júrip, kompıýterlik tehnıkany satý dúkeninde turǵyndarǵa zańsyz tutynýshylyq nesıeler resimdegen. Kúdiktiniń zańsyz nesıelerdiń kóbin 2018 jyldyń mamyr aıynan bastap tamyz aıyna deıin resimdegeni anyqtaldy. Osylaısha 9 mln teńgege zańsyz baıyǵan ol qyrkúıek aıynda belgisiz baǵytta aqshamen jasyrynyp ketken. Kúdikti qamaýǵa alyndy. Qazirgi ýaqytta QR QK 190-baby boıynsha sotqa deıingi tergeý óndirispen aıaqtaldy jáne ári qaraı sotqa tapsyrý úshin prokýratýraǵa jiberildi.
