Aqsýda terezeden qulaǵan bala qaıtys boldy
PAVLODAR. KAZINFORM — Aqsý qalasynda 2023 jyly týǵan bala úshinshi qabattan qulap ketti. Zardap shekken búldirshin áýeli qalalyq aýrýhanaǵa jetkizilip, keıin oblys ortalyǵyna jóneltilgen.
Dárigerlerdiń málimetinshe, shaqyrtý 11 maýsym kúni saǵat 13:16–da túsken. Úsh mınýttan keıin dárigerler oqıǵa ornyna jetedi. Jaraqat alǵan balany Aqsý qalalyq aýrýhanasyna jetkizip, odan soń Pavlodar oblystyq aýrýhanasyna tasymaldaǵan. Kishkentaı balanyń jaǵdaıy qulaý kezinde alǵan bas-mı jaraqatyna baılanysty aýyr dep baǵalandy.
— Ókinishke qaraı, dárigerlerdiń barlyq kúsh-jigerine qaramastan bala ota kezinde qaıtys boldy. Alǵan jaraqattary óte aýyr jáne ómirmen úılesimsiz edi. Jyl basynan beri Pavlodar oblysynda balalardyń terezeden qulaýynyń úsh jaǵdaıy tirkeldi, — dep habarlady óńirlik balalar aýrýhanasynan.
Balalardyń terezeden qulaýyna qatysty jazataıym oqıǵalar Pavlodar oblysynyń ár qalasynda bir jaǵdaıdan tirkelgen. Ekibastuzda bala besinshi qabattan qulaǵan. Qazirgi ýaqytta onyń jaǵdaıy turaqty. Zardap shegýshi aýrýhanadan shyǵaryldy.
Aqsýdaǵy oqıǵa boıynsha polıtseıler tekserý júrgizip jatyr.
— Kámeletke tolmaǵan jábirlenýshiniń ómiri men densaýlyǵynyń qaýipsizdigin qamtamasyz etý boıynsha mindetterdi tıisinshe oryndamaý deregi boıynsha barlyq mán-jaılardy jan-jaqty jáne obektıvti túrde anyqtaýǵa baǵyttalǵan tekserý is-sharalary júrgizilip jatyr. Nátıjeleri boıynsha zańdy sheshim qabyldanady, — dep habarlady Pavlodar oblysynyń polıtsııa departamentinen.
Eske sala keetıik, Almatyda jyl basynan beri tórt bala terezeden qulap ketti.
