Aqsýda polıtseılerdi esirtki satty dep aıyptaǵan turǵyn sózinen aınydy

AQSÝ. QazAqparat - Pavlodar oblysynyń polıtsııa departamenti 26 jastaǵy Aqsý turǵynynyń ótinishimen bopsalaý deregi boıynsha sotqa deıingi tergeýdi bastady, dep habarlaıdy QazAqparat.

Máseleniń mánisi mynada. Buǵan deıin jelide jábirlenýshiniń polıtsııa qyzmetkerlerin esirtki satty dep aıyptaǵan vıdeosy taraǵan bolatyn.

11 qarashada jábirlenýshi ózi polıtsııaǵa kelip, burynǵy tanystarynyń budan aqsha talap etkenin, oǵan tıesili avtokólikti alyp qoıǵanyn jáne ony bopsalaý maqsatynda polıtsııa qyzmetkerlerine qatysty vıdeo jazýǵa májbúrlegenin aıtyp shaǵymdandy.

Ol atalmysh tanystarynyń talabyn oryndaýdan bas tartqan kezde olar vıdeony jarııalap jibergen.

«Osy qylmysty jasady degen kúdikpen Aqsý qalasynyń jumyssyz turǵyndary (1989, 1994, 1995 jyly týǵan) anyqtalyp, Pavlodar qalasynyń ýaqytsha ızolıatoryna qamaldy. Nátıjesi boıynsha árbir qatysýshynyń is-áreketine quqyqtyq baǵa beriledi» deıdi Pavlodar oblysy polıtsııa departamenti tergeý basqarmasynyń bastyǵy Berik Oralov.