Aqsýda óz-ózin órtep jibergen er adamnyń áıeli kóz jumdy
AQSÝ. QazAqparat - Pavlodar oblysynyń Aqsý qalasynda otbasylyq mereke barysynda óz-ózin órtep jibergen er adamnyń áıeli kóz jumdy, dep habarlaıdy QazAqparat.
Oblystyq densaýlyq saqtaý basqarmasyna silteme jasap pavlodarnews.kz saıtynyń jazýynsha, 1974 jylǵy áıel Aqsý qalalyq aýrýhanasynda qaıtys boldy.
«Naýqas qatty kúıikten es jımastan 4 sáýir kúni saǵat 13:06-da kóz jumdy. Zardap shekken áıeldiń denesiniń 60-70 paıyzyn kúıik shalǵan», - dedi baspasóz qyzmetinde.
Eske salaıyq, 3 sáýir kúni keshqurym Aqsý qalasynyń Baýyrjan Momyshuly kóshesiniń boıynda jekemenshik úıdiń órtenip jatqany týraly aqparat túsken. Oqıǵaǵa kýá bolǵandardyń aıtýynsha, sol kúni ózin órtep jibergen er adamnyń jubaıynyń týǵan kúni bolǵan. Qonaqtar dastarhan basyna jınalǵannan soń, 50 jastaǵy otaǵasy úıden shyǵyp ketken. Keıin, benzıni bar bes lıtrlik kanıstrdy qolyna ustap qaıta kelgen. Balalardy úıden shyǵarýdy ótingen. Áıeli ótinishti oryndaǵannan soń er azamat sirińkeni tutatyp, ózin-ózi órtep jibergen. Ol sol orynda ajal qushty. Aýrýhanaǵa bes adam termııalyq kúıik shalyp tússe, kámeletke tolmaǵan taǵy bes bala ıis tıip jetkizilgen.
Órtten úsh bólmeli úıdiń as bólmesi, jıhazy, turmystyq tehnıkasy men úı zattary tolyǵymen janyp ketti. Shatyrdyń bir bóligi qulaǵan.
Fakti boıynsha QR QK-niń 105-babymen sotqa deıingi tergeý bastaldy.
Pavlodar oblystyq Polıtsııa departamenttiń habarlaýynsha, 1968 jyly týǵan otaǵasy PIK-te dánekerleýshi bolyp jumys istegen. Ol buǵan deıin usaq buzaqylyq jasaǵany jáne otbasylyq-turmystyq qarym-qatynasta quqyqqa qaıshy áreketteri úshin sottalǵan.
«Qaza bolǵan er adam 2019 jyldyń 12 aqpanynda «Usaq buzaqylyq» baby boıynsha ákimshilik jaýapqa tartylyp, oǵan 12 625 teńge kóleminde aıyppul salynǵan. Sondaı-aq 2 sáýirde otbasylyq-turmystyq qarym-qatynasta quqyqqa qaıshy áreketteri úshin jaýapqa tartyldy. Alaıda, Aqsý qalalyq soty taraptardyń tatýlasýyna baılanysty isti toqtatqan», - dedi Polıtsııa departamentiniń baspasóz qyzmetinen.
