Aqsýda oqýshylar asyqtan massajdy tósenishter jasaýda
PAVLODAR. QazAqparat - Aqsý qalasyna qarasty Mámáıit Omarov aýylyndaǵy Jambyl orta mektebiniń tehnologııa páni muǵalimi Jıenhan Hamanaıdyń oqýshylarmen birge jasaǵan massajdy tósenishteri kópshilik arasynda keńinen tanylýda, dep habarlaıdy pavlodarnews.kz.
«Rýhanı jańǵyrý» baǵdarlamasy aıasynda ulttyq qundylyqtardy nasıhattaýdyń tyń jolyn oılap tapqan ustaz osyndaı 11 tósenish qurastyryp, segizin saýdalap úlgergen. 14 sanamaqtyń da basym bóligin balabaqshalarǵa syıǵa tartqan.
«Ásirese balabaqshalardan massajerge degen suranys barshylyq. Sondaı-aq, turǵyndar tarapynanda tapsyrys túsýde. Mysaly, jýyrda tanys adamdardyń biri aýtızm dertine shaldyqqan balanyń emi úshin satyp alyp ketti»,- deıdi Jıenhan Hamanaı.
Balalardyń júrýine jáne tósek retinde salyp jatýǵa arnalǵan massajdy tósenish býyndar men olardyń arasyndaǵy baılanysyn kúsheıtedi, sharshaǵan bulshyq etterdi qalpyna keltiredi. Kishkentaı balalar men eresekter úshin paıdasy zor. Bir massajer tósenishke 108 jáne ekinshisine 80 asyq ketken. 
Búginde qolóner ıesi Aqsý qalasynyń № 1 qazaq orta mektebinde, № 8 jalpy orta bilim berý mektebinde jáne jas natýralıster stansasynda asyq úıirmesine jetekshilik etedi. Alty jyldyń ishinde 3 myńnan astam asyq jınaǵan. Onyń ishinde dalada oınaýǵa bolatyn qara maldyń 40 shaqty asyǵy kezdesedi.
«Balalardyń qyzyǵýshylyǵy óte joǵary. Bul dúnıelerdi mektepter men balabaqshalarda ádistemelik qural retinde qoldanǵan durys edi. Jobany qolǵa almas buryn adam densaýlyǵyna paıdasyn bilý úshin jan-jaqty zertteý júrgizip, málimetterdi jınaqtadym. Daıyndaý tehnologııasyna keletin bolsaq, asyqtardy aldymen tuz qosylǵan sýda tazartyp zalalsyzdandyramyz. Sonda súıektegi maıy men artyq zattarynan tazaryp shyǵady. Budan keıin túrli túske boıaımyz. Bolashaqta osy jobany ári qaraı jetildire túsý josparda bar»,- deıdi ustaz.
