Aqsýda qurylysyna 11 mlrd teńge bólingen jańa qazandyq áli paıdalanýǵa daıyn emes

PAVLODAR. QazAqparat – Merdiger jobada qarastyrylmaǵan jabdyqty ornatqan. Endi kómir usaqtaǵysh bólshek ne qaıta buzylyp alynýy kerek, ne memlekettik saraptamadan qaıta ótýi kerek, dep habarlaıdy QazAqparat.

Aqsý ákimdiginde ferroqorytpa zaýytynyń eski qazandyǵy 70 paıyzǵa tozǵany týraly osydan 10 jyl buryn aıtyldy. Osy sebepti qalada jańa qazandyq salý týraly sheshim qabyldandy.

Nysan qurylysyn aıaqtaý jáne paıdalanýǵa berý 2019 jylǵa josparlanǵan edi. Alaıda qurylys belgilengen merzimde aıaqtalǵan joq. Ol kezde jobanyń quny 10,8 mlrd teńgeni qurady.

2020 jyldyń kúzinde qurylysty aıaqtaýǵa taǵy 750 mln jetpeıtin bolyp shyqty. Problemalar munymen bitpedi. Jańa qazandyq birneshe jyldan beri iske qosylmaı tur.

Qazirgi ýaqytta merdiger jobany túzetip, ony memlekettik saraptamaǵa qaıtarýdy sheshti. Bul nysanda qujattarda kórsetilmegen qosymsha qondyrǵylar ornatylýymen baılanysty. Ony zańdastyrý kerek. Saraptama qorytyndysy qazan aıynyń sońyna deıin daıyn bolady.

«Ókinishke qaraı, 2019 jyly salynǵan jańa qazandyq áli iske qosylǵan joq. Oǵan merdiger memlekettik saraptamadan ótken jobada kózdelmegen qosymsha usaqtaý qondyrǵysyn ornatqany sebep boldy. Eki sheshim bar: qazandyqty iske qosyp, usaqtaǵyshtardy bólshekteý nemese ornatylǵan jabdyqty zańdastyryp, jobany retteý. Ekinshi joldy ustanǵan merdiger jobany retke keltirip, memlekettik saraptamaǵa jiberip jatyr, nátıjesi qazan aıynyń sońyna deıin shyǵady. Oń qorytyndy shyqqan jaǵdaıda jańa qazandyq paıdalanýǵa beriledi», - dedi Pavlodar oblysynyń ákimi Asaıyn Baıhanov.

Bıylǵy qysta Aqsý qalasyn burynǵydaı «AFZ» AQ-nyń eski qazandyǵy jylytady. Ondaǵy alty qazandyqtyń tórteýi jóndeldi. Bul jylytý maýsymyna jetkilikti. Taǵy eki qazandyqty jóndeý jumystary qazan aıynda aıaqtalady.