Aqsýda er adam ózin-ózi órtep jiberdi: 10 adam zardap shekti
AQSÝ. QazAqparat - Pavlodar oblystyq polıtsııa departamenti Aqsý qalasynda er adamnyń ózin-ózi órtep jiberý oqıǵasy týraly aıtty, dep habarlaıdy QazAqparat tilshisi.
Departamenttiń habarlaýynsha, Pavlodar oblysy Aqsý qalasynda jeke úıde ózin-ózi órtep, mert bolǵan jergilikti turǵyn PIK-te dánekerleýshi bolyp jumys istegen. Ol buǵan deıin usaq buzaqylyq jasaǵany jáne otbasylyq-turmystyq qarym-qatynasta quqyqqa qaıshy áreketteri úshin sottalǵan.
«Qaza bolǵan er adam 2019 jyldyń 12 aqpanynda «Usaq buzaqylyq» baby boıynsha ákimshilik jaýapqa tartylyp, 12 625 teńge kóleminde aıyppul salynǵan. Ekinshi sáýirde otbasylyq-turmystyq qarym-qatynasta quqyqqa qaıshy áreketteri úshin jaýapqa tartylǵan, alaıda Aqsý qalalyq soty taraptardyń tatýlasýyna baılanysty isti toqtatqan», - dedi Pavlodar oblystyq polıtsııa departamenti baspasóz qyzmeti.
Úshinshi sáýirde, saǵat 21:08-de Aqsý qalalyq polıtsııa bólimine B.Momyshuly kóshesi, 161 «A» mekenjaıynda órt shyqqany týraly habar túsken.
Otbasy 45 jastaǵy áıeldiń týǵan kúnin toılap jatqan. Sol kezde onyń kúıeýi ózine benzın quıyp, jaǵyp jibergen.1968 jyly týǵan azamat kóz jumdy. Bes adam «termııalyq kúıik shalyp», aýrýhanaǵa jetkizildi. Al, kámeletke tolmaǵan taǵy bes bala ıisti gazdan ýlanyp, aýrýhanaǵa tústi
Bul fakti sotqa deıingi tergeýdiń biryńǵaı tiziliminde QR QK 105-baby boıynsha tirkeldi. Birqatar saraptamalar taǵaıyndaldy. Tekserý júrgizilip jatyr.
Avtor: Anton Gagarın
