Aqsýda Elka esimdi muǵalim jumys isteıdi
ASTANA. QazAqparat - Aqsý qalasynyń Pogranıchnık aýyldyq aımaǵynda erekshe esimdi Elka degen muǵalim turady, dep habarlaıdy pavlodarnews.kz.
Elka Seıtbaıqyzy 1984 jyldyń 29-shy jeltoqsanynda Mońǵolııanyń astanasy Ulanbatyr qalasynda dúnıege kelgen. Sol kúni ata-anasy turǵan jerde jańa jyldyq shyrsha merekesi ótip jatqan. Olar birden merekeniń qurmetine qyzynyń esimin Elka dep qoıǵan.
Elka B.Ahmetov atyndaǵy pedagogıkalyq kolledjdi bastaýysh synyp muǵalimi mamandyǵy boıynsha támamdap, segiz jyldan beri Pogranıchnık aýylyndaǵy B.Momyshuly atyndaǵy orta mektepte jumys isteıdi. Úsh balanyń anasy.
«Mektepte jáne kolledjde oqyp júrgen kezimde atyma baılanysty kóp qyzyqtar oryn alatyn. Jańa jyl kezinde dos-qurbylarym «bizde shyrsha daıyn tur, ony satyp alýdyń qajet joq» dep qaljyńdaıtyn. Qazir de tanystarymnyń bári aldymen maǵan habarlasyp, jańa jylmen quttyqtaıdy. Óıtken, atym shyrshaǵa qatysty bolǵandyqtan umytylmaıtyn sekildimin. Bala kezimde esimimniń bulaı bolǵanyna yńǵaısyzdanyp, aýystyrǵym keletin. Al, qazir kerisinshe osylaı atalǵanyma qýanamyn», - deıdi Elka Seıtbaıqyzy.
Aıta keteıik, Statıstıka komıtetiniń habarlaýynsha Qazaqstanda 44 adamǵa Elka esimi berilgen. Sondaı-aq, taǵy 34 adam Elka transkrıptsııasymen tirkelgen.
Vedomstvo ókilderi Jańajyl esimdi 5 adamnyń bar ekenin aıtty.
