Aqsýda áıeldi óltirgen kúdikti ustaldy
PAVLODAR. KAZINFORM - Oblystyq polıtsııa departamenti adam óltirdi degen kúdikpen er azamatty ustady. Qazirgi ýaqytta ol qamaýda otyr.
Áıel adamnyń máıitiniń tabylǵany týraly aqparat búgin telegram arnasynda habarlandy.
Habarlama avtorynyń aıtýynsha, múrde Aqsý ferroqorytpa zaýytynan úsh shaqyrym jerde, Aqsý qalasy baǵytynda tabylǵan.
Pavlodar oblystyq polıtsııa departamenti qylmystyq oqıǵaǵa qatysty túsinikteme berdi.
- Aqsý qalasynda áıel adamdy óltirý deregi boıynsha qylmystyq is qozǵaldy. Polıtsııa kúdiktini ustap, ýaqytsha ustaý ızolıatoryna qamady. Qazirgi ýaqytta oqıǵanyń mán-jaıyn anyqtaýǵa baǵyttalǵan qajetti tergeý sharalary júrgizilip jatyr, - dep málimdedi departamentten.
Eske sala keteıik, Aqsý ferroqorytpa zaýytynda jumysshy qaza tapty.
