Aqsýda 8 jasar bala ashyq qudyqqa túsip ketti
PAVLODAR. QazAqparat - Polıtsııa starshınasy Dáýlet Muhamedsalyqov Aqsý qalasynda 8 jasar er balanyń ómirin qutqaryp qaldy, dep habarlaıdy «QazAqparat» HAA tilshisi.
Pavlodar oblystyq ІІD baspasóz qyzmeti habarlaǵandaı, Aqsý ishki ister bólimi jol-patrýldik polıtsııa vzvodynyń polıtsııa starshınasy Dáýlet Muhamedsalyqov demalys kúni óziniń jeke kóligimen jolda ketip bara jatady. Ol balanyń joldy kesip ótip bara jatqanyn, keıin múldem kózden tasa bolǵanyn baıqaıdy. Polıtseı sol orynǵa kelip, balany izdeı bastaıdy. Ashyq turǵan káriz lıýgynan balanyń daýysyn estıdi. 5 metr tereńdiktegi qudyqqa túsken bala ózdiginen shyǵa almaıdy. 8 jasar Baqtııar onyń ishinde jatyp úsik shalýy múmkin edi.
Sol mańnan ótip bara jatqan júk kóligin D. Muhamedsalyqov toqtatady. Júrgizýshiniń kóligindegi baspaldaqty alyp, qudyqqa túsip, balany qutqarady. Jedel járdem kelgenge deıin Dáýlet qorqyp qalǵan balaǵa alǵashqy kómek kórsetedi.
Uldyń ákesi Jandılov Danııar óziniń jáne otbasynyń atynan Pavlodar oblystyq ishki ister departamentine alǵys hat jazyp, polıtseıge ystyq yqylasyn bildiredi. ІІD bastyǵynyń buıryǵymen polıtsııa starshınasy Dáýlet Muhamedsalyqov alǵys hatpen marapattaldy.
