Aqsýda 51 jastaǵy er adam topyraq úıindisiniń astynda qaldy
PAVLODAR. QazAqparat - Topyraq úıindisiniń astynda qalǵan 51 jastaǵy er adam aýyr halde Aqsý ortalyq aýrýhanasyna jetkizildi, dep habarlaıdy pavlodarnews.kz.
TJD baspasóz qyzmetiniń málimetinshe, qaıǵyly jaǵdaı Tereshkova kóshesindegi jeke turǵyn úıdiń aýlasynda oryn alǵan.
«Er azamat sý ótkizý qubyrlaryn salý úshin jerasty jumystaryn júrgizý kezinde qumnyń astynda qalǵan. Jedel qutqarý jasaǵynyń kúshimen bir saǵat 20 mınýttan keıin ony alyp shyqty. Oqıǵa ornynda TJD-den eki adam men bir tehnıka jumys istedi, - dep málim etti departamentte.
Oblystyq densaýlyq saqtaý basqarmasynyń baspasóz hatshysy Elmıra Temirǵalıevanyń aıtýynsha, zardap shekken adam ortalyq aýrýhanaǵa túrli jaraqatpen jetkizilgen. Qazirgi tańda jaǵdaıy turaqty dep baǵalanýda. Aıta keterligi, osymen Aqsýda bir aıdyń ishinde eki qaıǵyly jaǵdaı tirkelgen. 18 qyrkúıek Lýgovaıa kóshesinde orǵa túsken topyraq dánekerleýshini basyp qalǵan. Ókinishke oraı, er adam kóz jumdy.
"Atalmysh fakti boıynsha tergeý júrgizilýde. Medıtsınalyq-sot saraptamasyn kútip otyrmyz. Budan keıin ǵana qaıǵyly oqıǵanyń óndirispen qatysy bar-joǵy anyqtalady. Rastalǵan jaǵdaıda is quqyq qorǵaý organdaryna jiberiledi", -deıdi memlekettik ınspektor Abyraı Sabyrov.
Er adam «AlıansPromStroı» JShS-inde dánekerleýshi bolyp jumys istegen.
