Aqsýda 5 jasar qyz ystyq sý toly shuńqyrǵa qulap ketti

PAVLODAR. KAZINFORM – Bes jasar jetkinshek oınap júrip ystyq sý toly orǵa qulaǵan. 

Qalalyq ákimdikten habarlaǵandaı, jazataıym oqıǵa Aqsýda bolǵan. 2019 jyly týǵan qyz bala Áýezov kóshesindegi «Chaıka» dúkenine qarama-qarsy jerdegi ystyq sý toly shuńqyrǵa túsip ketken. 

Ákimdik ókilderi shuńqyr qubyr jaryǵynan aqqan ystyq sýdan paıda bolǵanyn aıtady.

Jetkinshek oblystyq balalar aýrýhanasyna jetkizilip, kezekshi travmatolog pen reanımotolog qarap shyqqan. Dárigerler balanyń kókirek-arqa tusy men belinen tómengi jaqtaryn 1-3 dárejeli kúıik shalǵanyn, zaqymdaný aımaǵy 17%-dy quraǵanyn anyqtaǵan. Balanyń jaǵdaıy ortasha aýyr jaǵdaıda dep baǵalanyp, travmatologııalyq bólimshege jatqyzyldy.

Buǵan deıin Aqsý ferroqorytpa zaýytynda úsh jumysshy kúıip qalǵanyn jazǵanbyz.