Aqsý-Jabaǵyly taýlarynda úsh jyldan beri alǵash ret qar barysy kózge tústi
NUR-SULTAN. QazAqparat – Aqsý-Jabaǵyly memlekettik tabıǵı qoryǵynda qar barysy fototuzaqqa ilindi, dep habarlaıdy QazAqparat.
«Birneshe kún buryn Aqsý-Jabaǵyly memlekettik tabıǵı qoryǵynyń taýlarynda teńiz deńgeıinen 2500 metr bıiktikte qar barysy fototuzaqqa ilindi. Bul – óte sırek qubylys. Sońǵy ret Qazaqstannyń kóne qoryqtarynyń birinde taý patshasy úsh jyl buryn baıqalǵan», - dep jazdy áleýmettik jeli qoldanýshysy Sáken Dildahmet.
Tabıǵat qorǵaýshysy qoryqtaǵy ǵylymı mamandar men ınspektorlardyń jabaıy tabıǵatty saqtaý úshin úlken jumys júrgizip jatqanyn jazdy.
«Qar barysy – mysyqtuqymdastar arasyndaǵy eń tuıyǵy, tasada jasyryn tirshilik etedi. Sondyqtan ilbister taýly aımaqty mekendeıtin jaz mezgilinde jasalǵan osy kadrlar aıryqsha qundy. Óıtkeni olar sırek kezdesetin jyrtqyshtyń mekendeıtin jeri men popýlıatsııasyn odan ári zertteý úshin kerek. Bul jyrtqyshtyń Aqsý-Jabaǵyly qoryǵynda bolýy – erekshe qorǵalatyn tabıǵı aýmaqtyń úılesimdi jumysynyń dáleli, birinshi kezekte – bul ekojúıeni saqtaý, barystardyń qorektik bazasyna tikeleı áser etetin brakonerlikti boldyrmaý. Qoryqtar men ulttyq parkterdegi tabıǵat ózgerissiz qalýy kerek! Qoryqqa fototuzaq ornatqany úshin BUU Damý baǵdarlamasyna alǵys aıtamyn», - deıdi S. Dildahmet.
Buǵan deıin maýsym aıynda Almaty taýlarynda Dana atty qar barysy eki kúshigimen birge serýendegen edi.
