Aqsý-Jabaǵyly taýlarynda Qyzyl kitapqa engen qońyr aıý vıdeoǵa túsip qaldy

TÚRKІSTAN. QazAqparat – Túrkistan oblysyndaǵy Aqsý-Jabaǵyly qoryǵynda Tıan-Shan qońyr aıýynyń vıdeosy paıda boldy, dep habarlaıdy QazAqparat tilshisi.

Aıýdy bloger Aıbar Tóleýbekov kamerasy bar dronnyń kómegimen túsirip alǵan.

«Biz Aqsý-Jabaǵyly qoryǵynyń aýmaǵyna kirmes buryn ruqsat aldyq. Bizdiń maqsatymyz - tabıǵattyń sulýlyǵyn túsirý boldy. Dronmen vıdeo túsirgen kezde aıý men onyń qonjyǵy kezdeısoq túsirilgenin baıqadym», - dep bólisti vıdeo avtory.

Tabıǵat týraly Tabigat Media onlaın-basylymnyń málimetinshe, qońyr aıýdyń shaǵyn túri sanalatyn Tıan-Shan qońyr aıýy vıdeoǵa túsken.

Ol Qazaqstannyń Qyzyl kitabyna engizilgen.

Aqsý-Jabaǵyly – Qazaqstandaǵy eń eski jáne ıÝNESKO bıosferalyq qoryǵy mártebesin alǵan Ortalyq Azııadaǵy birinshi qoryq.

Ol Batys Tıan-Shan silemderinde teńiz deńgeıinen 1 000-nan 4 280 metrge deıingi bıiktikte ornalasqan.