Aqsý-Jabaǵylyda taýǵa shyqqan eki adamnyń biri kóz jumdy
ASTANA. KAZINFORM – Túrkistan oblysynda Tótenshe jaǵdaılar mınıstrliginiń qutqarýshylary teńiz deńgeıinen 2400 metr bıiktikte ornalasqan taýly aımaqta avarııalyq-qutqarý jumystaryn júrgizdi.
Operatsııa Tólebı aýdanyndaǵy Aqsý-Jabaǵyly memlekettik tabıǵı qoryǵy aýmaǵyndaǵy Shúnkildek asýynda ótti.
Vedomstvonyń málimetinshe, oqıǵa týraly habarlama taýda bolǵan er adamnan túsken. Onyń aıtýynsha, birge júrgen dosynyń densaýlyǵy kúrt nasharlap, kóz jumǵan. Al ózi de jaǵdaıynyń nasharlaýyna baılanysty taýdan ózdiginen túse almaı, qutqarýshylardyń kómegine muqtaj bolǵan.
Oqıǵa ornyna TJM kúshteri men quraldary, sondaı-aq «Qazavıaqutqarý» AQ tikushaǵy jiberildi.
– Tikushaqtyń kómegimen jetýi qıyn taýly aımaqtan 1993 jyly týǵan er adam evakýatsııalandy. Qaýipsiz jerge jetkizilgennen keıin ony jedel medıtsınalyq járdem qyzmetiniń dárigerleri qarap, qajetti kómek kórsetti. Gospıtalızatsııa qajet bolmady. Sondaı-aq taýdan 1978 jyly týǵan er adamnyń máıiti túsirildi. Aldyn ala málimet boıynsha, ol densaýlyǵynyń kúrt nasharlaýynan qaıtys bolǵan, – delingen TJM habarlamasynda.
Tótenshe jaǵdaılar mınıstrligi azamattarǵa taýǵa shyǵar aldynda jaqyndaryna baratyn baǵyty týraly aldyn ala habarlap, aýa raıy boljamyn eskerýge keńes beredi. Sondaı-aq ózińizben birge baılanys quraldaryn, jetkilikti mólsherde sý, dári qobdıshasy men qajetti dári-dármekterdi alyp júrý qajet ekenin eskertti.
Aıta keteıik, Aqtaýda Kaspıı teńizinen aǵys alyp ketken bes jasóspirim qutqaryldy.
