Aqsý zaýytynda ystyq sýǵa kúıip qalǵan mashınıst qyz aýrýhanada kóz jumdy
PAVLODAR. KAZINFORM – Aqsý ferroqorytpa zaýytynda jumys ústinde eki birdeı kran mashınısi kúıip qalǵany týraly habarlaǵan edik. Onyń biri úıine jiberilse, ekinshisi aýyr jaǵdaımen aýrýhanada qaıtys boldy.
Buǵan deıin atalǵan kásiporynnyń eki kran mashınısi kúıip, onyń biri aýrýhanaǵa jatqyzylǵanyn habarlaǵan edik.
Keıin jas qyzdyń denesiniń 80-85 paıyzyn kúıik shalǵany anyqtaldy. Qyz aýrýhanada komaǵa tústi.
Oblystyq densaýlyq saqtaý basqarmasynyń baspasóz qyzmeti zardap shegýshiniń aýrýhanada kóz jumǵany týraly habarlandy.
«25 jasar patsıent Pavlodar qalasyndaǵy №1 aýrýhanaǵa 25 mamyr kúni jansaqtaý bólimine jatqyzylǵan. Denesiniń 80-85 paıyzyn kúıik shalǵany anyqtaldy. Barlyq emdeý sharalary tolyqqandy júrgizilgenine qaramastan ol aýrýhanada kóz jumdy», - dep málimdedi basqarmadan.
Kúıik shalǵan eki qyzdyń biriniń jaǵdaıy qalypty, qazirgi ýaqytta ambýlatorııalyq em qabyldap jatyr.
Óndiris ornynda bolǵan jazataıym oqıǵa boıynsha óńirlik eńbek basqarmasy tekserý sharalaryn júrgizýdi bastady.
