Aqsý turǵyny Ertistiń jaǵasynan adamnyń jaq súıegin taýyp aldy
PAVLODAR. QazAqparat – Pavlodar oblysy Aqsý aýdanynyń turǵyny Ertis ózeniniń jaǵasynan adamnyń jaq súıegin taýyp aldy. Oqıǵa ornynda ýchaskelik polıtsııa, jedel-tergeý toby men tótenshe jaǵdaı qyzmetin jumys istep jatyr, dep habarlaıdy QazAqparat tilshisi.
Atalmysh oqıǵa týraly Pavlodarnews.kz saıty jazdy. Chındınder otbasy dostarymen birge GRES kentiniń mańyna jyldaǵy ádet boıynsha Ertisten balyq aýlaýǵa barǵan.
«Búgin aýa-raıy jaıly bolǵandyqtan dostarymyzben birge tabıǵat aıasynda tynystap qaıtýdy jón kórdik. Qaladan shyǵa beriste Ertistiń oń jaǵalaýynda jaǵajaı bar. Al sol jaǵynda biz balyq aýlaýdy ádetke aınaldyrǵanbyz. Kúndizgi saǵat 15.00 kezi bolatyn. Men quryqty ıire laqtyrǵan kezde ilmek qystyrylyp qalǵandaı boldy. Bórene nemese taıaq shyǵar dep oıladym. Jipti tarta bastaǵan soń, jaǵaǵa jaqyndadym. Salmaq jeńildegendeı boldy. Jaqyndap kelip. ilmektiń nege qystyrylǵanyn kórgende shoshyp qaldym. Men ǵana emes, bári qatty shoshydy. Óıtkeni adamnyń jaq súıegi tap bolyppyz», - deıdi. «Vita» izdeý jasaǵynyń belsendisi Olga Chındına.
Habar túsken boıyda oqıǵa ornyna ýchaskelik polıtsııa, jedel-tergeý toby men tótenshe jaǵdaı qyzmetiniń ókilderi jetken. Olganyń aıtýynsha, olar mańaıdy túgel tekserip shyqqan. Іzdeý jumystaryna súńgýir de shaqyrylypty.
«Sýretterden súıektiń sý betine qalaı shyqqanyn anyqtaý qıyn. Sý jaǵany jyryp, eski molalardyń birinen túsýi de múmkin. Bul aımaqta kóktemde osyndaı jaıttar jıi kezdesedi. Oblys boıynsha Ertis jaǵalaýynyń boıynda ornalasqan 15-ke jýyq jerleý orny bar. Súıek tabylǵan jerge barǵan soń naqty málimet bere alamyz», - deıdi belgili arheolog, Margulan centre ortalyǵynyń dırektory Tımýr Smaǵulov.
