Aqsý turǵyny Ertis ózenine batyp ketti

PAVLODAR. QazAqparat - Ertis ózeniniń belgilenbegen bóliginde sýǵa túsken Aqsý turǵyny batyp ketti, dep habarlaıdy QazAqparat Pavlodarnews.kz-ke silteme jasap.

Oblystyq TJD baspasóz qyzmetiniń málimetinshe, búgin jedel kezekshige saǵat 16:17-de Munaı bazasy aýmaǵyndaǵy Ertis ózeninde shomylýǵa ruqsat etilmegen jerde er adamnyń sýǵa batyp ketkeni týraly habarlama kelip túsken.

Oqıǵa ornyna Aqsý qalasynyń tótenshe jaǵdaılar bólimi men qutqarý bólimshesi jedel jetti.

«Aqsý qalasynda turatyn 2000 jyly týǵan er adamnyń saǵat 16:06-de dostarymen ishimdik ishkeni anyqtaldy. Osydan keıin azamat sýǵa túsip, óz kúshin eseptemeı, batyp ketken», - dep atap ótilgen baspasóz baıandamada.

Aıta keter bolsaq, buǵan deıin Pavlodar oblysynda 1999 jyly týǵan er adam ruqsat etilmegen jerde sýǵa shomylyp, batyp ketken edi.