Aqsý shatqalyn endi jańa kórý alańynan tamashalaýǵa bolady
ASTANA. KAZINFORM — Aqsý-Jabaǵyly qoryǵyna keletin týrıster úshin jańa múmkindik paıda boldy. Endi kelýshiler tereńdigi 500 metrge deıin jetetin Aqsý shatqalynyń keń panorasyn arnaıy jańa kórý alańynan tamashalaı alady.
Aqsý-Jabaǵyly memlekettik tabıǵı qoryǵyna kelýshiler úshin jańa týrıstik nysan ashyldy. Endi saıahatshylar tereńdigi 500 metrge deıin jetetin áıgili Aqsý shatqalynyń keń panorasyn arnaıy kórý alańynan tamashalaı alady.
Jańa nysan Aqsý-Jabaǵyly qoryǵynyń 100 jyldyq mereıtoıy aıasynda ashyldy.
Aqsý quz-shatqaly — qoryq aýmaǵyndaǵy eń tanymal tabıǵı nysandardyń biri. Onyń tereńdigi keı jerlerde 300–500 metrge jetse, joǵarǵy bóliginiń eni 800 metrge deıin sozylady. Shatqaldyń tik jartastary men aınalasyndaǵy tabıǵı landshaft kelýshilerge erekshe kórinis usynady.
Jańa kórý alańy týrısterge shatqaldy qaýipsiz jerden tamashalap, onyń tabıǵı erekshelikterin jaqynyraq kórýge múmkindik beredi. Sonymen qatar nysan tabıǵatty tamashalaý kezinde qaýipsizdikti qamtamasyz etýge jáne qoryqtaǵy ekologııalyq týrızmdi damytýǵa baǵyttalǵan.
Aqsý-Jabaǵyly qoryǵy — Ortalyq Azııadaǵy eń kóne qoryqtardyń biri. Onyń qurylǵanyna bıyl 100 jyl tolyp otyr. Mereıtoı aıasynda qoryqtyń tabıǵı murasyn tanytýǵa jáne kelýshiler úshin týrıstik ınfraqurylymdy damytýǵa baǵyttalǵan jobalar júzege asyrylýda.
Jańa kórý alańy da osy jumystardyń bir bóligi. Endi qoryqqa kelgen týrıster Aqsý shatqalynyń aýqymyn jańa núkteden tamashalap, tabıǵı kórinisti áserli rakýrstan kóre alady.
Buǵan deıin Aqsý-Jabaǵylyda jabaıy tabıǵat bir ǵasyr boıy qorǵalyp kele jatqanyn jazǵan edik.
