Aqsý men Ekibastuz qalalarynda erteńnen bastap avtomattyq baqylaý júıeleri iske qosylady
PAVLODAR. KAZINFORM — «EkinBoxSpotter Pavlodar» júıesiniń sertıfıkattalǵan 60 apparattyq-baǵdarlamalyq kesheni Pavlodar oblysynyń eki qalasynda jáne aýdan ortalyqtarynda jumys isteı bastaıdy.
Bul keshender kólik quraldarynyń qozǵalys jyldamdyǵyn avtomatty rejımde ólsheýge, quqyq buzýshylyqtardy tirkeýge, memlekettik tirkeý nómirlik belgilerin anyqtaýǵa arnalǵan.
— Jol-kólik oqıǵalarynyń sanyn azaıtý, sondaı-aq júrgizýshi tártibin arttyrý maqsatynda 22 tamyzdan bastap Ekibastuz, Aqsý qalalarynda jáne aýdan ortalyqtarynda «EkinBoxSpotter Pavlodar» júıesiniń 60 sertıfıkattalǵan apparattyq-baǵdarlamalyq kesheni jumys isteı bastaıdy. Avtomatty ólshegishter aqparatty Bas prokýratýranyń ákimshilik is júrgizýlerdiń biryńǵaı tizilimindegi derekter bazasyna berýge arnalǵan. Onda aıyppul tóleý qajettiligi týraly nusqama elektrondyq tásilmen tirkeledi, — dep habarlady Pavlodar oblysy polıtsııa departamentinen.
Tártip saqshylary shekti jyldamdyqtan asatyn júrgizýshi ózine ǵana emes, jol qozǵalysynyń ózge qatysýshylaryna da qaýip tóndiretinin eske salady.
Eske sala keteıik, aýyr júk kólikteri men jol sapasy máselesi tsıfrlandyrý arqyly sheshilmek.