Aqsý mektebinde jazý dápteri úshin ata-analardan aqsha jınalǵan
PAVLODAR. KAZINFORM — Aqsý qalasynyń Abaı atyndaǵy orta mektebinde jazý dápterleri úshin bastaýysh synyptardyń ata-analarynan aqsha jınalǵan. Birinshi synyptyń ata-analary jazý dápterleri úshin 1500 teńgeden, tórtinshi synyptaǵylar 2500 teńgeden bergen.
Ata-analar bul baryp turǵan zań buzýshylyq dep esepteıdi. Sebebi mektepterdegi pándik jazý dápterleri tegin berilýi kerek, oǵan bıýdjetten qarajat qarastyrylǵan. Al Aqsýdyń Abaı atyndaǵy mektebinde atalǵan oqý quralyna aqsha jınaý sońǵy jyldary dástúrge aınalyp ketken. Tipti bul iske muǵalimderdiń aralasqany da anyqtaldy.
— 2021 jyldan beri aqshaǵa satyp alyp kelemiz. Buryn aýylda turǵanda tegin alyp kelgen dápterlerdiń qalaǵa kelgende ne sebepti aqyly bolyp ketkenin túsine alar emespiz. Birneshe balam mektepte oqıdy. Mysaly, birinshi synyp úshin dúnıetaný men jaratylystaný dápterlerin, tórtinshi synypqa jaratylystaný, dúnıetaný, qyzyqty matematıka dápterlerin satyp alyp jatyrmyz. Ata-analar komıtetiniń tóraǵasy: «Jazý dápterleri ınternet-dúkender arqyly qymbatqa shyǵady, sondyqtan kóterme baǵamen arzanǵa aldyrtamyz», dep 1-synyptyń jazý dápterleri úshin 1500 teńgeden, 4-synyp úshin 2500 teńgeden jınap jatyr. Bul máselege synyp jetekshileri de aralasyp otyr, — dep muńyn shaqty bastaýysh synyptyń ata-anasy (aty-jónin kórsetpeýdi ótindi).
Anyqtaǵanymyzdaı, álgi 4-synypta 27 bala bilim alady. Sonda bir ǵana synyptan 67 500 teńge qarajat jınalady eken. Al Abaı mektebindegi tórtinshi synyptar sany — 9. Bıyl tek birinshi synyp boıynsha 10 synyp jınalǵan. Olardyń árqaısynda 24 baladan otyr. Endeshe bir ǵana mektepten qansha qarajat jınalatynyn esepteı berińiz.
Pavlodar oblysy bilim salasynda sapany qamtamasyz etý basqarmasynyń basshysy Gúlnár Úzdembaeva Aqsý qalasynyń bilim berý bólimi 1-synyptarǵa arnalǵan negizgi pánder boıynsha dápterler 100% satyp alǵanyn habarlady.
— Dápterdi bilim berý mekemelerine berý tolyq kólemde júzege asyryldy. Oqý ádebıetterin, jumys dápterlerin satyp alýǵa qarajat jınaýǵa tyıym salynady. Eger ata-analar tarapynan suraq týyndasa 8 (718) 37 6-59-41 telefony arqyly habarlasýǵa bolady, — dedi departament basshysy.
Al Abaı atyndaǵy mektep dırektory Sholpan Karıeva synyptarda jazý dápterleri úshin aqsha jınalyp jatqanynan beıhabar ekenin habarlady. Basshy retinde buǵan arnaıy buıryqpen tyıym salǵan.
— 2022 jyldan bastap qalalyq bilim berý bólimi birinshi synyptardy «Álippe», «Matematıka», «Ana tili» jumys dápterlerimen tegin qamtamasyz etip keledi. Olardyń jetispeýi múmkin emes. Mektebimizde 2000 oqýshy oqysa, olardyń teń jartysy bastaýysh synyptarda bilim alyp jatyr. Al ózge pánder boıynsha jazý dápterlerin alý — ár ata-ananyń jeke qalaýy. Al eger pedagogter aralasyp jatqany anyqtalsa, mindetti túrde shara qoldanylady, — deıdi mektep basshysy.
Bul másele boıynsha óńirlik bilim berý basqarmasynyń jalpy, orta jáne mektepke deıingi bilim berý bólimine habarlastyq.
— Talap boıynsha jazý dápterleri tek 1-synyptarǵa ǵana mindetti. Tolyqtaı bıýdjet qarajatyna satyp alynyp, mektepterge taratylady. Al 2, 3, 4-synyptarǵa jazý dápterlerin satyp alýǵa eshkim májbúrleı almaıdy. Keıbir synyptyń ata-analary óz sheshimderimen alǵysy kelse, oǵan kedergi keltire almaımyz. Biraq bul máselege mektep dırektory da, synyp jetekshisi de aralaspaýy tıis, — dep jaýap berdi bólim basshysy Nurgúl Azanbaeva bylaı dep jaýap berdi.
Eske sala keteıik, bıylǵy oqý jylynda Pavlodar mektepterinde 116 myńnan asa oqýshy bilim alady.