Aqsý qarttar úıiniń 65 turǵynynan koronavırýs tabyldy

PAVLODAR OBLYSY. QazAqparat – Aqsý qarttar úıiniń 65 turǵynynyń koronavırýs juqtyrǵany belgili boldy. Sondaı-aq, mekemeniń on bir qyzmetkerine de osyndaı dıagnoz qoıyldy, dep habarlaıdy QazAqparat tilshisi.

«Qarttar men múgedekterge arnaıy áleýmettik qyzmet kórsetetin Aqsý ortalyǵynyń 65 turǵyny men on bir qyzmetkerinen koronavırýs anyqtaldy», - dep habarlady Pavlodar oblystyq densaýlyq saqtaý basqarmasynyń jetekshisi Aıdar Sıtqazınov.

Basqarma basshysynyń aıtýynsha, ınfektsııa juqtyrǵan 65 turǵynnyń 33-i statsıonarǵa jatqyzylǵan.

«Jaǵdaılary – jeńil jáne ortasha. Biraq qosymsha syrqattary bolǵandyqtan, biz olardy Aqsý ınfektsııalyq aýrýhanasyna jatqyzýdy jón kórdik. Sondaı-aq bir naýqasqa buǵan deıin ota jasalǵandyqtan, jaǵdaıy aýyr», - dep tolyqtyrdy Sıtqazınov myrza.

Sanıtarııalyq-epıdemıologııalyq baqylaý departamenti ókilderi QazAqparat tilshisine ortalyq turǵyndarynyń jaǵdaıyn baqylap otyrǵanyn jetkizdi.

Turǵyndar statsıonarda em alyp jatyr, olarǵa qajetti medıtsınalyq kómek kórsetilip, jaǵdaıdyń bári jasalǵan.

Vırýs juqtyrǵan on bir ortalyq qyzmetkeriniń tórteýi úı karantıninde.

Qajetti dezınfektsııalyq jáne sanıtarlyq-epıdemıologııalyq is-sharalar jasaldy.