Aqsý qant zaýytynyń mamandaryna turǵyn úı salynady
TALDYQORǴAN. QazAqparat - Almaty oblysyndaǵy Aqsý qant zaýytynyń iske qosylýyna atsalysyp, zaýytta jumys isteıtin kásibı mamandarǵa Jansúgirov kentinde 20 páterli úı salynady.
Qurylysy kúzde bastalady. Bul týraly búgin Aqsý qant zaýytyna barǵan saparynda oblys ákimi Amandyq Batalov aıtty, dep habarlaıdy QazAqparat tilshisi.
Óńir basshysy aldymen «Álıhan» sharýa qojalyǵynyń alqabynda bolyp, qyzylsha sebý naýqanynyń barysymen tanysty. Bul sharýashylyq ótken jyly 15 gektarǵa qant qyzylshasyn seýip, ár gektarynan 700 tsentnerge deıin ónim alǵan. Bıyl qant qyzylshasynyń kólemin 35 gektarǵa jetkizip otyr. Ótken jyly bir gektarynan 450 myń teńge kiris alǵan. Bıylǵy qyzylsha sebý kezinde óz tehnıkasymen qosa aýdanda qurylǵan servıstik daıyndaý ortalyǵynyń tuqym sepkish tehnıkasyn paıdalanýda.
Oblys ákimi budan keıin Aqsý qant zaýytyna bardy. Zaýyt ınvestorlary kásiporyndy jańǵyrtý barysymen tanystyrdy. Nysannyń bas korpýsyndaǵy tsehtardy, jylý elektr stantsııasynyń, qant qabyldaý ornynyń jaǵdaıyn kórdi.
Esterińizge sala keteıik , buǵan deıin habarlaǵanymyzdaı, Almaty oblysynyń ákimdigi men «Energosmost» konsortsıýmy Aqsý qant zaýytyn iske qosý jóninde ózara yntymaqtastyq týraly memorandýmǵa qol qoıǵan bolatyn.
