Aqsý qant zaýytyn jańǵyrtýǵa 12 mlrd teńge jumsalady

TALDYQORǴAN. QazAqparat - Almaty oblysyndaǵy Aqsý qant zaýytynda jańǵyrtý jumystary júrgizilip jatyr. 8 qańtar kúni sharýalardan qabyldanǵan qant qyzylshasyn óńdeý aıaqtalyp, mamandar zaýyttyń  tehnologııalyq qural-jabdyqtaryn  jańartýǵa kiristi, dep habarlaıdy QazAqparat tilshisi.

Aqsý qant zaýytyn jańǵyrtýǵa 12 mıllıard teńge ınvestıtsııa baǵyttalmaq.    Ol birneshe kezeń boıynsha júzege asyrylady. Mamandardyń aıtýynsha, zaýyt aldaǵy eki-úsh jylda tolyq qýatyna kóshetin bolady. Ol kezde qant shyǵaratyn mekeme jylyna 350 myń tonna ónim óndertin bolady. Ótken jyldyń  qazan aıynda iske qosylǵan zaýytta  67 797 tonna qant qyzylshasy óńdelip, 4 myń tonna qant alynǵan. Qazir mekemeniń qoımasynda 500 tonnadaı qant bar. Bul jerde 50 kelilik bir qap qumshekerdiń baǵasy 8 myń teńge turady.
 

«Aqsý qant zaýyty 10 jyl toqtap turdy.  Bir jylda bárin jańalaý múmkin emes. Bul zaýyttyń ózinde  60 shaqyrym qubyr júıesi, 60 shaqyrym kabel bar. Byltyr aýqymdy bóligin aıyrbastadyq, bıyl bul isti jalǵastyryp  jatyrmyz», - dedi Almaty oblysy ákiminiń orynbasary Serikjan Beskempirov.

Qant qyzylshasyn ósirý qaıta qolǵa alynǵan Jetisý óńirinde bıyl 11 myń gektarǵa tátti túbir egý josparlanǵan. Óńir basshylyǵynyń sózinshe, sharýalar úshin ónimdiligi joǵary tuqym men jeńildetilgen janarmaı daıyn tur. Máselen, bıyl solıarkanyń  1 lıtri 146 teńgeden berilmek. Al naryqta onyń baǵasy - 160 teńge.