«Aqsý qant» zaýytyn qalpyna keltirýge 300 adam jumyldyryldy

TALDYQORǴAN. QazAqparat - Almaty oblysyndaǵy Aqsý aýdanynda 10 jyl boıy toqtap turǵan qant zaýytyn qalpyna keltirý jumystary qarqyndy júrip jatyr. Qazirgi tańda bilikti kadrlarmen qatar 300 adam zaýytta eńbek etýde, dep habarlaıdy QazAqparat tilshisi.

Qaıta jandanyp jatqan nysanǵa Májilis depýtaty Serik Úmbetov arnaıy baryp, atqarylyp jatqan jumystyń barysymen tanysty. 1967 jyly salynyp, toqyraý jyldary toqtap  qalǵan zaýyt jumysshylarynyń 80 paıyzdan astamy áli aýylda turady. Aýyl halqy táýligine 3 myń tonna qant qyzylshasyn óńdeıtin alyp kásiporynnyń jańǵyrtylýymen  Jansúgirov aýylyna da qan júgiredi degen senimde. Bıyl Aqsý qant zaýyty 200-den asa sharýashylyqtan  100 myń tonna tátti túbir qabyldaıdy dep kútilýde. Odan 10-11 myń tonna qazaqstandyq tabıǵı qant shyǵarylmaq. 

Aıta keteıik, Elbasynyń tikeleı tapsyrmasyna sáıkes, Almaty oblysynda qant qyzylshasyn qaıta ósirý myqtap qolǵa alyndy. Bıyl  tátti túbirdiń alqap kólemi 9 myń gektarǵa jetti. Odan 300 myń tonnadan astam qant qyzylshasyn jınap, 30 myń tonna taza ónim alý josparlanýda. Osylaısha, ımportqa táýeldilikti azaıtý kózdelgen. Qazirgi tańda Almaty oblysynda qant qyzylshasyn qabyldaıtyn jalǵyz «Kóksý qant zaýyty» ǵana istep tur.