Aqsý qant zaýyty naýryzda jumysyn jandandyrady

TALDYQORǴAN. QazAqparat - Aqsý qant zaýyty osy jyldyń naýryz aıynda iske qosylyp, 40-50 myń tonna qamys qantyn óndirýdi josparlap otyr, - dep habarlaıdy QazAqparat tilshisi.

Zaýyt qaıta jabdyqtalyp, jańa jeliler qoıylǵan, qazir iske qosý jumystary júrgizilip jatyr. Úsh myń tonna qant quraǵyn ákelýge kelisimshart jasalǵan, oǵan Alajıde temir jol stansasynda 7 myń tonnalyq qoıma daıyndaldy. Qyzylsha ósirý jetkilikti kólemge jetkizilgende, zaýyt ony da óńdeýge daıyn. Bul týraly Aqsý aýdanynyń turǵyndarymen kezdesýi kezinde Jetisý oblysynyń ákimi Beıbit Isabaev aıtty.

Úsh saǵatqa sozylǵan kezdesýde oblys basshysyna 30-dan astam saýal qoıyldy.

Óz baıandamasynda Beıbit Isabaev oblystyń áleýmettik-ekonomıkalyq damýynyń negizgi baǵyttaryna toqtaldy.

Esterińizge sala keteıik, Prezıdent Qasym-Jomart Toqaevtyń ózi qazan aıynda Taldyqorǵanǵa barǵan saparynda Aqsý qant zaýytynyń jumysyn syńǵa alǵan bolatyn.

«Elimizdegi 4 qant zaýytynyń ekeýi Jetisýda ornalasqan. Onyń bireýi – Aqsý qant zaýyty jumys istemeı tur. Zaýytty iske qosýǵa 2017 jyldan bastap oblystyq bıýdjetten 12 mıllıard teńge jumsaldy. Alaıda, seriktes ınvestor tarapynan serpindi jumys baıqalmaı otyr. Bıyl jazda elimizde qant birden qymbattap, tipti, tapshylyq týyndady. Onyń bári quzyrly organdardyń salǵyrttyǵynyń kesirinen boldy. Tipti, tıisti kadrlyq sheshimder qabyldaýymyzǵa týra keldi», - degen edi Qasym-Jomart Toqaev Taldyqorǵandaǵy

2022 jyldyń qazan aıyndaǵy saparynda.

Osy synnan keıin birden jergilikti bılik iske kirisip, Aqsý qant zaýytyn jandandyrýǵa bar kúshterin salýda.