«Aqsý» qant zaýyty qaldyqty da paıdaǵa jaratýdy josparlap otyr
TALDYQORǴAN.QazAqparat - Almaty oblysyndaǵy Aqsý qant zaýyty 130 tonna qant qyzylshasyn óńdeýdi josparlap otyr. Byltyr bul ónim 60 myń tonna kóleminde bolǵan, dep habarlaıdy QazAqparat tilshisi.
10 jyl boıy toqtap turǵan kásiporyn jylda jańǵyrýdan ótip, tolyq qýatyna kóshý úshin kezeń-kezeńmen jumystar atqarýda. Máselen, bıyl júrgizilgen jańǵyrtýdyń nátıjesinde zaýyt «qaldyqsyz óndiris» prıntsıpimen jumys istemek.
«Aqsý qant zaýyty 2020-2021 jylǵa qaraı tolyq qýatyna shyǵyp, 350 myń tonnaǵa deıin qyzylsha óńdeıtin bolady», - dedi Aqsý aýdanyna jumys saparymen baryp, qant zaýytynyń jumysymen tanysqan Almaty oblysynyń ákimi Amandyq Batalov.
Bıylǵy jyly 130 myń tonnaǵa deıin qyzylsha óńdeýdi josparlap otyrǵan zaýytta qaldyq jomdardy nyǵyzdap oraıtyn norvegııalyq qurylǵylar ornatylýda. Zaýyt dırektory Samat Nadırbaevtyń aıtýynsha, jańǵyrtýdyń qazirgi ekinshi kezeńindegi jóndeý-iske qosý jumystaryna 280 adam tartylǵan. Olardyń arasynda sheteldik mamandar da bar. Al zaýyt tolyq iske qosylǵanda qyzylsha óńdeý isine jergilikti 600 adam jumysqa qabyldanatyn bolady. Búgingi kúnge deıin tehnologııalyq quraldardy jóndeý-ornatý shamamen 84 % aıaqtaldy. Zaýyttyń synamalyq iske qosý merzimi 15 qyrkúıekke, al tolyq iske qosylýy 15 qazanǵa belgilenip otyr. 20 myń tonna alǵashqy qyzylsha kólemin jınap alǵannan keıin kásiporyn toqtaýsyz jumysqa kirispek. Eger josparlanǵanyndaı bıylǵy jyly 130 myń tonna qant qyzylshasy óńdeletin bolsa, odan shamamen 22 myń tonna jom alynady eken. Buryn ótkiziletin orynǵa jom júk kóliginde ashyq-shashyq kúıde tasymaldanyp, jol boıy sýy aǵyp, tıisti jerge jetkenshe sapasy tómendep ketetin. Endi bıyldan bastap jomdy nyǵyzdap, jańa qurylǵymen qaptamaǵa oraýǵa jaǵdaı jasalyp otyr. Oralǵan kúıindegi jom 2 jylǵa deıin sapasyn joǵaltpaıdy. Jáne eshqandaı hımıkatsyz, ekologııalyq taza ónim - mal bordaqylaý alańdary úshin taptyrmas azyq. Aldaǵy ýaqytta bul daıyn ónimderdi otandyq naryqqa, sonymen qatar shetelge de eksporttaýǵa múmkindik týmaq.
