Aqsý qalasynda órtengen páterden qarııanyń denesi tabyldy
AQSÝ. QazAqparat - Pavlodar oblysynyń Aqsý qalasynda páter órtenip, bir adam kóz jumdy, dep habarlaıdy QazAqparat.
Oblystyq tótenshe jaǵdaılar departamentiniń málimetinshe, 30 qazan kúni keshki 17.30 kezinde Aqsý qalasynyń mańyndaǵy Qalqaman aýylynda páter órtenip jatqany jaıly habar túsken.
Órt sóndirý qyzmeti tez arada otqa oranǵan úsh qabatty turǵyn úıge kelip jetti.
«Úıdiń ekinshi qabatyndaǵy páterdiń bir bólmesinde 15 sharshy metr aýmaqta úı jıhazdary, zattar men turmystyq tehnıka janǵan. Qyzmetkerler páterdi tekserý kezinde 1949 jyly týǵan er adamnyń denesin tapty» dep málim etti oblystyq TJD baspasóz qyzmeti.
Qutqarýshylar kelgenge deıin osy úıde turatyn 15 adam, onyń ishinde eki bala ǵımarattan shyǵyp úlgergen.
Vedomstvonyń málimetine sensek, tilsiz jaý keshki 18.07 shamasynda sóndirilgen. Aldyn ala sebep - otty paıdalanǵanda abaılamaý.
