Aqsý qalasy Ekibastuzdyń kúıine túsýi múmkin – depýtat dabyl qaqty
«Byltyr Ekibastuz qalasynda oryn alǵan apatty jaǵdaı el esinen kete qoıǵan joq. Búginde apattyń saldarymen kúresip, jóndeý jumystary júrgizilip jatyr. Búgingi bizdi tolǵandyryp otyrǵany Pavlodar oblysyna qarasty Aqsý qalasynyń jylý máselesi. Atap aıtar bolsaq, 73 myńdaı halyq turatyn shahar búginde Aqsý ferroqortpa zaýytynyń qazandyǵy arqyly jylytylyp keledi. Onyń da qazandyqtarynyń tozyǵy jetip turǵandyǵy jasyryn emes. Oǵan qalanyń eskirgen ishki jylý júıesin qosyńyz. Alda-jalda apat oryn ala qalsa, Ekibastuzdyń kúıine túsýi múmkin ekendigin eskertemiz», - dedi Energetıka mınıstri Almasadam Sátqalıevtiń atyna saýal joldaǵan depýtat.
Onyń dereginshe, qalaǵa jeke qazandyq salý jumysy 2016 jyly qolǵa alynyp, qurylys jumysy 2017 jyly bastalǵan. «Aqsý qalasynyń qurylys bóliminiń» tapsyrysy boıynsha 10 mlrd 698 mln teńge bólingen. Alaıda qarjy jekiliksiz dep tanylyp, osy ýaqytqa deıin jalpy alǵanda 12 mlrd-qa jýyq qarajat jumsalǵan.
«Biraq, salynyp, iske qosylǵan qazandyq joq. Qala shetine boı kótergen nysan merdigerden merdigerdiń, sýbmerdigerdiń qolyna ótken túsiniksiz nysan bolyp áli tur. Endi, el bıýdjetinen mıllıardtaǵan qarajat jumsalǵan qurylys úshin kim jaýap beredi? Bul arnaıy tekseristi, jeke-dara qaraýdy qajet etetin saýal. Sondyqtan erteń qystyń kózi qyraýda Aqsý qalasynyń turǵyndary da jylýsyz qalýy múmkin degen qaýippen dabyl qaǵyp otyrmyz. Ári arnaıy sharalar qabyldanyp, másele shuǵyl sheshimin tabýy kerek. Endigi kezekte máseleni túbegeıli sheshý úshin mınıstrlik janynan shuǵyl túrde arnaıy komıssııa qurylýy qajet. Shahardyń jylý júıesindegi máseleler jedel saraptalyp, onyń túpkilikti sheshilý joly aıqyndaýly kerek degen oıdamyz», - dedi Jarqynbek Amantaıuly.
