Aqsý qalasynyń jańa ákimi tanystyryldy
PAVLODAR. KAZINFORM - Ánýarbek Amanov Pavlodar oblysy Aqsý qalasynyń ákimi laýazymyna taǵaıyndaldy. Ol buǵan deıin Pavlodar qalasy ákiminiń orynbasary bolyp qyzmet atqarǵan.
QR Prezıdenti Ákimshiliginiń, qalalyq máslıhat depýtattarynyń kelisimimen jáne óńir basshysynyń ókimimen Aqsý qalasynyń ákimi laýazymyna Ánýarbek Amanov taǵaıyndaldy.
Ánýarbek Dúısembaıuly 1986 jyly dúnıege kelgen. Eki joǵary bilimi bar. 2008 jyly S.Toraıǵyrov atyndaǵy Pavlodar memlekettik ýnıversıtetin «Avtomobıl jáne traktor jasaý» mamandyǵy boıynsha, al 2020 jyly Qaztutynýodaǵy Qaraǵandy ekonomıkalyq ýnıversıtetin «Quqyqtaný» mamandyǵy boıynsha támamdaǵan.
Eńbek jolyn 2009 jyly Pavlodar qalasynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń bas mamany bolyp bastady. 2009-2023 jyldary turǵyn úı ınspektsııasy bóliminde qyzmet atqaryp, bas mamannan bólim basshysyna deıingi eńbek jolynan ótti. 2023-2024 jyldary Ekibastuz qalasy ákiminiń orynbasary boldy. Bul laýazymǵa taǵaıyndalǵanǵa deıin Pavlodar qalasy ákiminiń orynbasary qyzmetin atqardy.
- Aqsý - óńirdegi jalpy ónerkásip óndirisiniń shamamen 17%-yn qamtamasyz etip otyrǵan, Pavlodar oblysynyń negizgi ónerkásip ortalyqtarynyń biri. Búgingi basty mindet - qol jetkizilgen damý qarqynyn saqtap qana qoımaı, turǵyndar úshin jaıly ári zamanaýı ómir súrý ortasyn qalyptastyrý, - dep habarlady Pavlodar oblystyq ákimdiginen.
Basym mindetterdiń biri retinde kommýnaldyq ınfraqurylymdy jańǵyrtý máseleleri ataldy. Atap aıtqanda, qalanyń jylýmen qamtý júıesiniń senimdiligin arttyrý, sý qubyry jáne káriz jelilerin odan ári jańǵyrtý, Aqsý kentinde jylý jelilerin salý, aldaǵy jylý berý maýsymyna sapaly ári ýaqytyly daıyndalý, sondaı-aq anyqtalǵan barlyq eskertýlerdi joıa otyryp, jańa qalalyq qazandyqty iske qosý jáne paıdalanýǵa berý jumystaryn aıaqtaý tapsyryldy.
Abattandyrýǵa qatysty birqatar naqty tapsyrma júkteldi. Aldaǵy eki jyl ishinde barlyq aýla aýmaqtaryn retke keltirý, negizgi kósheler men jaıaý júrginshiler joldarynyń asfalt jabynyn jańartý, sondaı-aq jeke sektordaǵy barlyq kóshelerdi tolyqtaı asfalttaý qajet. Budan bólek, ortalyq saıabaqty qaıta jańǵyrtý, júzý basseıniniń qurylysyn ýaqytyly aıaqtaý jáne qalany keshendi kógaldandyrý jumystaryn jalǵastyrý tapsyryldy.
Eske sala keteıik, Pavlodar oblysynyń Aqqýly aýdanyna jańa ákim taǵaıyndaldy.
